पद्मरत्नयात श्रद्धाञ्जली बीपिनि हूल, १ बजे शवयात्रा

येँ – मदुम्ह नेवाः न्ह्यलुवाः पद्मरत्न तुलाधरयात श्रद्धाञ्जली बिइगु निंतिं नेता, भाषिक कार्यकर्ता, मानवअधिकारकर्मी, व्यापारीत म्वःम्वः वय्कःया छेँय् थ्यनाच्वंगु दु । वय्कःयात श्रद्धाञ्जली बीगु निंतिं थौं सुथय् गृहमन्त्री रामबहादुर थापा वय्कःया छेँय् झाःगु दु ।

अथेहे नेकपा नेता झलनाथ खनाल, अमृत बोहरा, अष्टलक्ष्मी शाक्य, अमिक शेरचन, कृष्ण गोपाल श्रेष्ठ, केशव स्थापित, अग्नी सापकोट, नेपाली कांग्रेसया उपसभापति प्रकाशमान सिंह, कृष्ण सिटौलापिं लिसें नेकपा मालेया नेता सीपी मैनाली थ्यनेधुंकूगु दु । अथहे नेपाल चेम्बर अफ कमर्सया पुलांम्ह नायः सुरेन्द्रवीर मालाकार, नेपाल सुनचाँदी व्यवसायी संघया पुलांपिं अध्यक्ष तेजरत्न शाक्य, मणिरत्न शाक्यपिं लिसें पदाधिकारीपिं नं थ्यंगु दु । अथे हे भाषिक कार्यकर्तात वय्कःया छेँय् मुनाच्वंगु दु ।

थौं न्हिनय् १ बजे वय्कःया शवयात्रा जुइत्यंगु दु । शवयात्रा वय्कःया छेँ लाजिम्पाटं न्ह्यानाः लानिपुखू, असं, थायमदु, त्यंगः, छत्रपाटी, जोखिंपाखाः जुयाः कर्णद्वीप शोभाभगवतिइ यंकी । कर्णद्वीपय् वय्कःयात राजकीय सम्मान सहित अन्तिम संस्कार याइ । वय्कःया सीम्ह उपप्रधानमन्त्री इश्वर पोखरेलं नेपाःया ध्वाँय् फायेकाः, सेनां सलामी बियाः अन्तिम संस्कार याइगु जूगु दु ।