ने. सं. ११४६ सिल्लाथ्व दुतिया -

‘आः बालेनया सुचं नं खारेज जुइमाः’

येँ(नेपालभाषा टाइम्स)- स्वनिगःया थीथी खुसि सिथय् ४० मिटर थाय् त्वःताः जक छेँ दने दइ धकाः सर्वोच्च अदालतं याःगु फैसलाया बारे पुनर्विचार याइगु जुइवं आः उगु फैसला कार्यान्वयन यायेत येँ मनपां जारी याःगु सुचं नं खारेज जुइमाःगु सः थ्वयावःगु दु ।

सर्वोच्चपाखें अज्याःगु फैसला यायेवं यल, ख्वप, थिमि नगरपालिकातय्सं आपत्ति प्वंकूसां येँ मनपां धाःसा छगू सुचं पिकासें उगु फैसलायात कार्यान्वयन यायेमाःगु जूगुलिं आः उगु लागाय् छेँ दनेगु रोक्का यायेगु धकाः निर्देशन बिउगु खः । आः सर्वोच्चं थःपिंसं न्हापा याःगु फैसलायात पुनर्विचार याइगु जूगुलिं थ्व निर्देशन नं खारेज जूगु खँ धयाहःगु दु ।

खोला मापदण्ड पीडित संघर्ष समितिया संयोजक सुमन साय्मिं आः थःपिं येँ मनपाय् वनाः वं यानातःगु रोक्का फुकुवा याये मालधकाः इनाप याःवनेगु खँ कनादीगु दु । म्हिगः ‘नेपालभाषा टाइम्स’ लिसे खँल्हासें वय्कलं ४० मिटरया मापदण्ड सम्बन्धी फैसला विचाराधीन जूवंगु कारणं आः बालेन साहं यानातःगु रोक्का नं औचित्यहिन जूवंगु बिचाः तयादिल । वय्कलं धयादिल, ‘आः मनपां यानातःगु थ्व रोक्का फुकुवा या धकाः जिपिं महानगरय् धाः वनेत्यनागु दु । यदि फुकुवा मयात धाःसा वयात नं मुद्दा तयेगु जुइ ।’

येँमनपा २३ वडाया अध्यक्ष लिसें मनपा विधायन समितिया संयोजक मचाराजा महर्जनं नं म्हीग सर्वोच्चं थ्व विषयय् हानं वहस न्ह्याकेगु धाःगुलिं मनपां यानातःगु रोक्काया सूचना खारेज जुइमाःगु बिचाः तयादीगु दु । आः सर्वसाधारणं मनपाय् वनाः थ्व रोक्का खारेज जुइमाः धकाः दबाब बिउ वनेमाःगु खँ नं वय्कलं कनादीगु दु ।

सर्वोच्च अदालतं म्हीग ४० मिटरया मापदण्ड सम्बन्धी फैसलाय् हानं वहस याकेगु धकाः निर्णय याःसां थ्व वहस गबलेनिसें शुरु जुइ धइगु खँ धाःसा सी मदुनि । संघर्ष समितिया संयोजक साय्मिं कनादी कथं आः सर्वोच्चं वहस यायेगु धकाः पेशी चढे यात कि वहस न्ह्याइ । अज्याःगु वहसय् सर्वसाधारणपाखें नं वकिलतय्सं न्ववाःवने दइ ।

थ्व वहसय् आः सर्वसाधारणपाखें सु सु वनाः वहस यायेगु व उकिया लागिं गय् यानाः तयारी धकाः नं संघर्ष समितिं सहलह ब्याकूगु दु । साय्मिं कनादी कथं म्हिगः नं कानुनविद्तय् पुचःलिसे खँल्हाबल्हा जूगु खः । थ्व विषययात कयाः जुइगु हरेक पेशी कुन्हु थःपिंसं खबरदारी ¥याली यायेगु खँ नं वय्कलं कनादिल ।

थ्व मुद्दाय् आः सरकार वादी जूसा बागमती सभ्यता बचाउ अभियानकर्तात प्रतिवादी जुइ । बागमती बचाउ अभियानं खुसि सिथय् न्हापा कायम यानातःगु २० मिटरया मापदण्ड कार्यान्वयन याके मालधकाः सर्वोच्चय् रिट तःगु खः । तर सर्वोच्चं न्हापाया २० मिटर जक मखु उकी नं मेगु २० मिटर थपे यानाः ४० मिटरया मापदण्ड कायम या धकाः आदेश बिउगु खः । उकिं थ्व मुद्दाय् वादीतय्सं माग हे मयाःगु खँ समेत दुथ्याकाः सर्वोच्चं फैसला यात धकाः द्वपं लानाच्वंगु दु ।