देगः दुने मेगु देगः
येँ – थौंकन्हय् पुनर्निर्माणया लागिं थुनाच्वंगु ग्वलया जयबागेश्वरी देगः दुने हानं मेगु देगः लुया वःगु दु । भुखाचं क्षति जूगु थुगु देगः पुनर्निर्माण यायेत छुं ई न्ह्यवंनिसें थुनेगु शुरु याःगु खःसा देगः थुथुं वंबलय् देगः दुने हानं मेगु देगः लुया वःगु खः । थौंकन्हय् थुनाच्वंगु देगः स्वतँजाःगु खःसा अन दुने छतँजाःगु मेगु देगः लुया वःगु खः ।
देगः दुने हे मेगु देगः लुया वःगु खनाः अनया पुजारी लिसें स्थानीय मनूत समेत अजूचाःगु दु । उगु लागाया सामाजिक कार्यकर्ता लिसें भाषासेवी जलद वैद्यं कनादी कथं अन च्वंपिं तसकं पुलांपिं ज्याथजिथितय्सं तकं जयबागेश्वरीया छतँजाःगु देगः गबलें खंगु मदुनि ।अन थ्व देगः लुया वःगु स्वयेबलय् न्हापा थ्व देगः छतँजाःगु खःसा लिपा उकियात हे स्वतँजाः याःगु खः ला धकाः अनुमान यायेफु ।
तर थ्व देगः गुगु इलय् छतँजाः जुयाच्वंगु खः व गबले उकिया द्यःने स्वतँजाःगु मेगु देगः दन धइगु खँ धाःसा सुनां नं मसिउ । भाजु वैद्यं कनादी कथं जयबागेश्वरी देगः सम्बन्धी छुं अभिलेखय् नं थुकिया बारे च्वयातःगु लूगु मदुनि ।हाल स्वतँजाः दुगु देगः नितँ थुंबलय् अन दुने मेगु देगः लुया वःगु खः । ‘गजू लुल ।
थ्व छु जुइ धकाः धमाधम थुथुं वंबलय् मेगु हे देगः लुया वल,’ वैद्यं कनादिल । थ्व तसकं अजूचायापुसे च्वंगु खँ जूगुलिं थुकिया बारे अध्ययन अनुसन्धान यायेमाःगु आवश्यक खने दया वःगु दु । उकिं स्थानीय मनूतय्सं थौं न्हिनय् २ बजे थीथी संस्कृति व पुरातत्वविद्तय्त थुकिया अवलोकन याकेत्यंगु दु ।
LEAVE YOUR COMMENTS