ज्याझ्वलय् नेवाः न्ह्यलुवा मल्ल के. सुन्दर, क्यालिजात्रा फाउन्डेसनया प्रमुख लिसें लिपि विशेषज्ञ आनन्दकुमार महर्जन, नेपालभाषा केन्द्रीय विभागया प्रमुख सह–प्रा.डा. राजनलाल जोशी, नेपाल लिपि गुथिया नायः अनिल स्थापित आदिपिं पाहाँ कथं उपस्थिति दुगु खः ।

थौंया आधुनिक युगय् लिपिया संरक्षण व प्रवर्धन यायेत डिजिटल मार्केटय् वनेमाःगु खँयात महसुस यासें क्यालिजात्रा फाउण्डेसन व भारतया नांजाःगु फन्ट डिजाइन कम्पनी ‘एक टाइप’ जानाः ‘नित्या रञ्जना’ नामं थ्व फन्ट विकास याःगु खः । थ्व विकास यायेगु लागिं नेपाःपाखें लिपि विशेषज्ञ आनन्दकुमार महर्जनया सल्लाह कथं तथागत विश्वास, सारंग कुलकर्णी व नूपुर दात्यें ज्या यानादीगु खः ।

रञ्जना लिपिया थ्व फन्ट अनलाइन, पत्रपत्रिका, सफू आदि न्ह्यागु ज्याय् नं छ्यले फइगु खँ धाःगु दु । थुकियात अनलाइनपाखें डाउनलोड यानाः काये फइ । थ्व फन्ट विश्वन्यंकं निःशुल्क उपलब्ध जुइ । नेपालय् आः तक उपलब्ध मेमेगु रञ्जना लिपिया फन्ट स्वयां थ्व फन्ट सुन्दर जक मखु अःपुक च्वये फइगु व छुं गल्ती नं पिहां मवइगु कथं विकास यानातःगु खँ धाःगु दु ।

फन्टया सार्वजनिक ज्याझ्वः लिपा लिपियात कयाः सहलह ज्याझ्वः नं जूगु खः । उगु ज्याझ्वलय् न्ववासें मनपाया उपमेयर सुनिता डंगोलं आखः दयेकेमाःगु महत्वपूर्ण खँ खः, आः आखः दयेकेधुंकूगु जुयाः थ्वयात न्ह्याथासं अःपुक छ्यले फइ धयादिल । वय्कलं धयादिल, ‘झीके थुलि अःपुक लिपि आखः उपलब्ध जुइधुंकल, आः रञ्जना लिपि छ्यलेत सुं नं ग्यायेमाःगु मन्त । आः सुनां नं गल्ती जुइक लिपि छ्यले माली मखुत ।’

ज्याझ्वलय् उगु फन्ट छ्यलाः च्वयातःगु थीथी धापू, वर्णमाला, डिजाइन आदि नं ब्वयातःगु खः । सार्वजनिकरण ज्याझ्वलय् आपालं लिपि व भाषा विशेषज्ञ, क्यालिग्राफर, टाइपोग्राफर, डिजाइन प्रोफेसर, फन्ट डिजाइनर, आइटी विज्ञतय्गु नं उपस्थिति दुगु खः ।