ने. सं. ११४६ अनलाथ्व नवमी -

कन्हय् जामनः गुभाजुया निगू शो

येँ – नेपालभाषाया बहुप्रतिक्षित फिल्म जामनः गुभाजु न्हापांगु प्रदर्शन यायेगु तयारीया झ्वलय् बिहिवाः फिल्म दयेकेत ग्वाहालि याःपिंत सम्मान याःगु दु ।जामनः गुभाजु न्हापांखुसी क्यनेगु बारे जानकारी बिइगु निंतिं याःगु पत्रकार सम्मेलनया झ्वलय् फिल्म दयेकेत ग्वाहालि याःगु थीथी संस्था व व्यक्तिपिनि म्हसिका बिसें वय्कःयात हनेज्या याःगु खः ।

फिल्म कन्हय् शनिवाः बागबजाः हे सिटीम्याक्स हलय् न्हापांखुसी प्रदर्शन जुइत्यंगु दु । कन्हय् सुथय् ८ः३० बजे व ११ः३० बजे यानाः निगू शो जुइगु खँ फिल्मया निर्माता राजेन्द्रभक्त श्रेष्ठं धयादीगु दु । धर्मोदय सभाया नायः व बौद्धविद्वान यज्ञमानपति वज्राचार्यं ज्याझ्वलय् न्ववानादिसें थःम्ह विश्वास हे मयाना कथं फिल्म दयेकाः पिहां वःगु खँ धयादिल ।

‘न्हापांखुसी जामनः गुभाजुया बारे सहलह यायेगु निंतिं निर्देशक रवि व वय्कःया टिम झाःबलय् जिं फिल्म दयेकी धयागु विश्वास हे मयानागु खः, तर आः दयेकाः पिहां वःगु दु’ वय्कलं धयादीगु दु । फिल्मया मू पात्र जामनः गुभाजु जुयाः म्हिताच्वनादीम्ह कलाकार सुशील राजोपाध्यायं फिल्मपाखें नेपाः व नेवाःतय् इतिहास संरक्षण यायेगु कुतः यानागु खँ धयादिल ।

थ्व फिल्मया बाखं व धकिं बाखं नं वय्कलं हे च्वनादीगु खः । १७ औं शताब्दीया नांजाःम्ह तान्त्रिक जामनः गुभाजुया जीवनी अधारित थ्व प्याखनय् जुजु प्रताप मल्लया भूमिका नांजाःम्ह कलाकार पुष्करभक्त माथेमा, जामनः गुभाजुया कलाःया भूमिकाय् सरस्वती मानन्धरं म्हितातःगु दुसा साकार पन्त, उदेन न्हूसाय्मि, संघरत्न शाक्य, लक्ष्मीनाथ तिमिल्सिना, सुलोचना मानन्धर, सुरज व्यञ्जनकार, अन्नपूर्णेश्वरी श्रेष्ठ, अमिता जोशीपिंसं म्हितातःगु दु ।

फिल्मय् तत्कालिन ईयात जीवन्त जुइक क्यनेगु निंतिं भिएफएक्स प्रविधि गाक्क हे छ्यलाःगु खँ धाःगु दु । निर्देशक साय्मिं ४० प्रतिशतं धयाथें फिल्मय् भिएफएक्स प्रविधि छ्यलागु धासें थ्व हे प्रविधि पाखें स्वदँ न्ह्यवया तःभुखाचं दुंगुं मरुसतःयात नं दनेगु कुतः यानागु खँ कनादिल । फिल्म मेगु शनिवाः नं सिटी म्याक्सय् हे क्यनेगु ग्वसाः दयेकातःगु दु ।