क्यानाडाया नागरिक

नेपालय् नागरिकता सम्बन्धय् व्यापक अन्तरविरोध, असन्तुष्टि ब्वलनाच्वंगु इलय् भारतय् नं छम्ह नायकया नागरिकता प्रकरणयात कयाः तःधंगु हे चर्चा जुयाच्वंगु दु । बलिउड खेलाडी नायक अक्षय कुमारया नागरिकताया विषययात कयाः भारतय् थ्व इलय् तःधंगु चर्चा जुयाच्वंगु दु । विशेषतः ट्विटरय् अक्षयया नागरिकायात कयाः तःधंगु चर्चा जुयाच्वंगु दु ।

सकसिनं सिउगु हे खँ खः कि थ्व इलय् भारतय् लोकसभाया चुनाव जुयाच्वंगु दु । चुनावय् भारतया आपालं हे सेलिब्रिटीतय्सं मतदान यात, तर अक्षयं धाःसा मतदान मयाः । थुकिया लिउने छगू हे जक कारण खः, वयागु नागरिकता विवाद । खतुं अक्षयं भोट मकुर्कूगु खँय् पत्रकारतय्सं आपालं उकिया कारण न्यंगु खः ।

तर, वं छुं नं लिसः मबिल । वयां लिपा छक्वलं हे अक्षयया राष्ट्रियतायात कयाः न्ह्यसः थनेगु ज्या तकं जुल । तःधंगु हे चर्चा व बहसया विषय जुइवं अन्तत अक्षयं थःगु म्हुतु चायेकल । अले वं थः क्यानेडियन नागरिक जूगु खँ प्रष्ट यात । ‘थ्व इलय् जिगु नागरिकताया विषययात कयाः आपालं नकारात्मक खँ पिहां वयाच्वंगु दु, गुगु जिं गबलें नं विचाः मयाना’ अक्षयं धाःगु दु, ‘खः जिके क्यानाडाया नागरिकता दु, तर जिं वंगु न्हय्दँ न्ह्यवंनिसें क्यानाडाय् पलाःतकं तयागु मदु ।

भारतप्रति तसकं माया दुगु व थःगु कर्मभूमिप्रति गुलि माया दु धकाः सुयातं प्रमाणित यानाच्वने म्वाःगु अक्षयं धाःगु दु । अक्षयं भारतय् च्वनाच्वंसां नं क्यानाडाया नागरिकता त्याग मयाःगु खँय् वयागु आलोचना नं जुयाच्वंगु दु ।