किपूया लाभा पुखूया उलेज्या जुल

किपू – किपूया ऐतिहासिक लाभा पुखू जिर्णोद्धार लिपा उलेज्या जूगु दु । शुक्रवाः छगू ज्याझ्वःया दथुइ किपू नगरपालिकाया मेयर रमेश महर्जन पुखूया उलेज्या यानादीगु खः । उलेज्याझ्वलय् न्ववानादिसें मेयर महर्जनं पुखूया जिर्णोद्धार लिपा सम्पदा, संस्कृतिया संरक्षण ला जूगु दु, आः थुकिं आर्थिक उपार्जन पाखे नं ध्यान बीमाःगु आवश्यक दु धयादिल । थुकिया निंतिं पुखू क्षेत्रय् न्हियान्हिथं वइपिं आन्तरिक पर्यटकतय्त गुकथं आकर्षण यायेगु खः अज्याःगु व्यवस्था यानाः पुखूपाखें हे स्थानीयतय्त आर्थिक रुपं तिबः बीफइगु कथंया ज्या यायेमाःगु बिचाः वय्कलं तयादीगु खः ।

ज्याझ्वलय् न्ववानादिसें वय्कलं आः किपूया लाय्कु दयेकेगु ज्या नं न्ह्यायेत्यंगु जानकारी बियादीगु खः । लाय्कू दयेकेगु निंतिं शुक्रवाः हे टेन्डर आह्वान जूगु खँ वय्कलं धयादीगु खः । पुखू चाःहिले ज्याछिंक निजी जग्गा बियादीपिं स्थानीय जग्गा थुवाःयात सुभाय् दछासें वय्कलं वडा नं. ३ य् लाःगु थीथी बाजंखलःयात खिं, ढोलक, भुस्या आदि नं लःल्हानादीगु खः ।

किपू नपा वडा नं. ३ या अध्यक्ष राजेन्द्र महर्जनया सभापतित्वय् जूगु ज्याझ्वलय् उपमेयर सरस्वति खड्का रिजालपिनि नं उपस्थिति दुगु खः ।