कोरोना भाइरस : स्वनिगःया थीथी थासय् ३ हजार नमुना परीक्षण
येँ – स्वनिगःया थीथी थासय् ३ हजार स्वयां अप्व कोरोना भाइरसाया परीक्षण यायेगु ज्या जूगु दु । इपिडिमियोलोजी तथा रोग नियन्त्रण महाशाखां येँया कालिमाटी, गांगबु, भृकुटी मण्डप व थीथी थाय्या सरसफाइ केन्द्रय् संक्रमणया परीक्षण याःगु खः ।
स्वास्थ्य तथा जनसंख्या मन्त्रालयया प्रवक्ता डा. विकास देवकोटाया कथं छुं दिं थुके स्वनिगलय् र्यापिड डाइग्नोस्टिक टेस्ट (आरडीटी) पाखें २ हजार २ सय ३६ व पोलिमरेज चेन रियाक्सन (पीसीआर) विधिपाखें १ हजार १९ यानाः मुक्कं ३ हजार २ सय ५५ नमुना परीक्षण याःगु जानकारी बियादिल ।
कालिमाटीया तरकारी बजारय् आरडीटीपाखें ७ सय व पीसीआरपाखें ३ सय ३४ नमुनाया परिक्षण याःगु खः । उकी मध्ये आरडीटीपाखें याःगु परीक्षणय् ३म्हेसिया रिपोर्ट पोजेटिभ वःगु खःसा पीसीआरपाखें याःगु परीक्षणय् फुक्कं नेगेटिभ वःगु खः ।
अथेहे सरसफाइ केन्द्रय् ६ सय ६४ नमुना आरडीटी व २ सय ६७ नमुना पीसीआर विधिपाखें परीक्षण याःगु खः । ९ सय ३१ नमुना परीक्षण मध्ये आरडीटीइ ३१म्हेसिया रिपोर्ट पोजेटिभ वःगु खःसा लिपा पीसीआरपाखें याःगु परीक्षणय् फुक्क नेभेटिभ वःगु खः ।
अथेहे ग्वंगबुइ आरडीटी व पीसीआरपाखें ५ सय ९२ नमुना परीक्षण यायेगु झ्वलय् आरडीटीपाखें याःगु १५ नमुना पोजेटिभ वःगु दु । पीसीआरया रिपोर्ट धाःसा मवनी । उखे भृकुटी मण्डपय् याःगु ६ सय ९६ नमुना परीक्षण याःगु खः । उकी मध्ये आरडीटीपोखं याःगु ३२ नमुना पोजेटिभ वःगु खःसा पीसीआरया लिच्वः मवनी ।
मन्त्रालयया कथं मंगलवाः तक नेपालय् आरडीटीपाखें ७४ हजार ६ सय ४९ व पीसीआर विधिपाखें ३२ हजार ६ सय ४ नमुना परीक्षण यायेधुंकूगु दु ।
LEAVE YOUR COMMENTS