सीमसीयाके सचिवं घूस फ्वंगु मन्त्रीया द्वपं

येँ – मेलम्ची खानेपानी आयोजनाया ठेकेदार बिसिउँ वंगु खँयात कयाः खानेपानी मन्त्री बिना मगर व सचिव गजेन्द्र ठाकुरया विवाद सार्वजनिक जूगु दु । खानेपानी मन्त्रालयं सचिव ठाकुरयात सरुवा याना बीवं ठाकुरं मन्त्री मगरयात देश दुबे यायेत्यंगु द्वपं बियादीगु दु ।
मेखे मन्त्री मगरं सीएमसीयात बीमाःगु ध्यबाय् सचिव ठाकुरं कमिशन फ्वंगु धासें मेलम्चीया ज्या याकनं क्वचायेकेत थम्हं सीएमसीयात लित सःतेत्यनागु खँ कनादिल ।

सीएमसीलिसे वार्ता यायेत मन्त्री मगरं मेलम्ची आयोजनाया उपनिर्देशक भोजविक्रम थापायात सिंगापुरय् वार्ता याके छ्वःगु खः । थापाया पुचलं समेत सीएमसीया प्रतिनिधिलिसे ध्यबाया बार्गेनिङ याःगु खँ धाःगु दु । वार्ताया झ्वलय् सीएमसीया प्रतिनिधिं एक्स्ट्रा लागत व थप ईया निंतिं डिस्प्युट बोर्डय् १ अर्ब ६५ करोड दावी याःगु खः ।

उकियात कयाः मन्त्रालयं पुनरावेदन यात । लिपा बोर्डं ३६ करोड सीएमसीयात बीमाःगु निर्णय यात । थ्वहे ३६ करोडय् सचिवं कमिसन माग याःगु मन्त्रालयया धापू दु । सीएमसीया नेपाःया प्रतिनिधि क्रिस्टियानों सचिवयात कमिसन बीमाःसा थःपिं ज्या लिहां मवयेगु धाःगु खँ सीदुगु दु ।

स्रोतया कथं सीएमसीं थःपिं मेलम्ची वयेगु खःसा ठाकुर लिसे ज्या याये फइ मखु धकाः धाःगु खःसा उकियात कयाः प्रधानमन्त्री केपी ओली लिसे वार्ता जूगु खः । वार्ता लिपा मेलम्चीयात हाकनं ठेक्का आह्वान यायेबलय् ताः ई काइगु जुयाः सीएमसीयात हे सःतेगु बारे प्रधानमन्त्री लिसें मन्त्रिपरिषद नं सहमत जुइवं सीएमसीयात लितः सःतेगु व सचिव ठाकुरयात सरुवा यायेगु ज्या जूगु खः ।

ठाकुरयात आयोजनां चीके धुनेवं आः याकनं हे सीएमसीया प्रतिनिधि नेपाः वयाः ज्या न्ह्याकेगु कथं थप वार्ता जुइगु खँ धाःगु दु । सीएमसीयात हे ज्या याकल धाःसा स्वलाया दुने ज्या क्वचाइगु खँ धाःगु दु । न्हूगु ठेक्का आह्वान यायेमाल धाःसा मेगु स्वदँया ई काइगु खँ नं धाःगु दु ।