स्वनिगः छगुलिं सीसी क्यामराया निगरानीइ

रासस- स्थानीय तहलिसे समन्वय व नेपाल प्रहरीया थःगु हे स्रोत परिचालन यानाः स्वनिगलय् निगरानी अप्वयेकेत थप सीसी क्यामरा जडानया निंतिं प्रहरीं आवश्यक प्रक्रिया न्ह्याकूगु दु । सरकारी योजनाकथं क्यामरा जडान यायेत महानगरीय प्रहरी ज्याकू येँय् नं संवेदनशील क्षेत्रया पहिचानया ज्या न्ह्याकूगु खः । अज्याःगु थाय्या पहिचानलिसें आन्तरिक स्रोतपाखें ठेक्का आह्वान यानाः न्हापांगु चरणय् ७५ गू थासय् क्यामरा जडान यायेगु तयारी यानागु महानगरीय प्रहरी ज्याकू येँया प्रहरी नायब महानिरीक्षक शैलेश थापा क्षेत्रीं जानकारी बियादिल । क्यामरा जडानया निंतिं स्थानीय तहं तकं उच्च प्राथमिकता बिया वयाच्वंगु दु ।

छुं महिना न्ह्यः गृहमन्त्री रामबहादुर थापाया उपस्थितिइ प्रहरी उच्च अधिकारीलसे जूगु सहलहया इलय् तकं स्वनिगःया स्थानीय तहया प्रमुखं सीसी क्यामरा जडानयात प्राथमिकता बीमाःगु खँय् बः बिसें आवश्यक खर्च मिले यायेत नं तयार दुगु प्रतिवद्धता प्वंकूगु खः । क्यामरा तयेगु ज्याया गति धाःसा सुस्तरुपं न्ह्याः वनाच्वंगु दु । यद्यपि ज्या तीव्र रुपं न्ह्याः वनाच्वंगु प्रहरीया धापू दु ।

‘स्वनिगःया स्वंगुलिं जिल्लाया आवश्यक क्षेत्रयात सीसी क्यामरापाखें निगरानी यायेगु योजना खः, तर छक्वलं फइमखु, विस्तारं प्राथमिकताया आधारय् क्यामरा तयाः वनेगु जुइ’, थापां कनादिल, ‘छुं छुं प्रहरीया हे स्रोत परिचालन जुइ, छुं छुं थासय् धाःसा स्थानीय तहलिसे समन्वय यानाः जडान यायेगु जुइ ।’

महानगरीय प्रहरी ज्याकू येँइ् नं स्वंगुलिं जिल्लाया संवेदनशील क्षेत्र पहिचान यानाः गुलि सीसीटिभी क्यामरा मालीगु खः, उकिया विवरण छ्वया हयेत महानगरीय ट्राफिक प्रहरी महाशाखा, महानगरीय प्रहरी परिसर येँ, यल व ख्वपय् तकं पत्रचार यायेधुंकूगु दु । विवरण वयेधुंकाः प्राथमिकताया आधारय् क्यामरा जडान जुइगु ज्याकूया प्रवक्ता पूजा सिंहं जानकारी बियादिल । थौंकन्हय् स्वनिगलय् ४६० या जःखः क्यामरा प्रयोग जुयाच्वंगु दु । येँय् जक ४०२ क्यामरा प्रयोगय् दु । ख्वपय् ३४ व यलय् २४ क्यामरा प्रयोगय् दु ।

‘जनघनत्व अप्वया वनाच्वंगु इलय् स्वनिगलय् थुलि क्यामरा नं तसकं म्हो खः, व हे नं न्हियान्हिथं स्यनाच्वनीगु व मर्मत यायेगु क्रम नं न्ह्याना हे च्वंगु जुइ, उकिं थप क्यामराया आवश्यक जुइ, जिपिं उकिया हे प्रक्रियाय् दु’, प्रवक्ता सिंहं धयादिल । थप यायेत्यंगु क्यामरा गज्याःगुकथया माःगु खः, गुलि जिबीया आवश्यक जुइ धकाः प्रहरी प्रधान ज्याकूलिसें माग यानागु धासेंं प्रहरी प्रवक्ता सिंहं ज्याकूया इन्जिनियरं बिउगु सुझावया लिधंसाय् क्यामरा न्यायेगु जानकारी बियादिल । क्यामरा जडान यायेगु थाय् छनोटया निंतिं गठन जूगु समितिं आः आवश्यक ज्या यानाच्वंगु दु ।

मुख्यतः सीसी क्यामराया निगरानी महानगरीय प्रहरी ज्याकू येँय् नं यानाच्वंगु दु । थीथी क्षेत्रय् संचार नेटवर्कलिसें स्वाकाः नियन्त्रण कक्षपाखें क्यामराया निगरानी तया वयाच्वंगु दु । उकिया निंतिं ७२ गः कन्ट्रोल रुप भेहिकल (सीआरभी)या तकं प्रयोग यानागु महानगरीय प्रहरी ज्याकू येँया प्रहरी नायब महानिरीक्षक थापां जानकारी बियादिल ।

सीसी क्यामराया कारणं आपालं आपराधिक गतिविधिया निगरानी व अपराधय् संलग्न मून ज्वनेत सफल जूगु दसू दु । महानगरीय ट्राफिक प्रहरी महाशाखाया प्रवक्ता जयराज सापकोटां पत्र थ्यंकः वयेधुंकूगुलिं क्षेत्र पहिचान यानाः पेश यायेगु तयारी यानाच्वनागु धयादिल । सवारी दुर्घटना यानाः बिसिउँ वंपिं चालक ज्वनेत व अदालतय् प्रमाण पेश यायेत तकं प्रहरीया निंतिं सीसी क्यामरां तःधंगु ग्वाहालि यानाच्वंगु दु । तर आवश्यक मात्राय् क्यामरा मदुगुलिं धाःसा घटनाया अनुसन्धानय् समस्या जुयाच्वंगु प्रहरीया धापू दु ।

सम्बन्धित बुखँ

LEAVE YOUR COMMENTS