देय् दबू यलया न्हापांगु अधिवेशन जुइगु

यल(नेपालभाषा टाइम्स)- नेवाःतय् राष्ट्रिय संगठन नेवाः देय् दबूया यल जिल्ला कमिटीया न्हापांगु अधिवेश जुइगु जूगु दु । थ्व हे वइगु पुस ३० गते देय् दबू यल जिल्लाया अधिवेशन जू वनाच्वंगु दु ।

यल जिल्ला कमिटीया अधिवेशनया निंतिं आः नकतिनि च्वंगु सरोकारवाला समितिया पदाधिकारीया मुँज्यां उगु निर्णय याःगु खः । देय् दबू स्वनिगः विशेष प्रदेश, यल जिल्ला समितिलिसें यल जिल्लाया स्वंगुलिं नगर कमिटी यल महानगरपालिका कमिटी, गोदावरी नगर कमिटी व महालक्ष्मी नगर कमिछटीया पदाधिकारी व प्रतिनिधितय् मुँज्यां अधिवेशनया बारे सहलह ब्याकूगु खः ।

देय् दबू यल जिल्लाया नायः हेराकाजी महर्जनया अध्यक्षताय् च्वंगु बैठकं वइगु दिनय् यल जिल्लाया दक्व नेवाः संघसंस्था, खलः, पुचःपाखें प्रतिनिधित्व याकाः विशेष भेला यायेगु, देय् दबूया सकल दुजःपिंनिसें थीथी व्यक्तिया मुँज्या यायेगु नापं नेवाः मिसा दबू यल जिल्लाया संयोजनय् दबुलिइ आवद्ध मिसापिनिगु भेला यायेगु नं निर्णय याःगु दु ।

दबूया यल जिल्लाया अधिवेशनया निंतिं च्वंगु मुँज्यां थीथी समिति नं गठन याःगु दु ।