लुम्बिनीइ बुद्धिष्ट इन्टरनेशनल ट्राभल मार्ट–२०१८

नेपाःयात बौद्ध पर्यटन केन्द्रया रुपय् स्थापित यायेगु उद्देश्यं ‘बुद्धिष्ट इन्टरनेशनल ट्राभल मार्ट–२०१८’या ग्वसाः ग्वइगु जूगु दु । थ्व हे वइगु पुस २६ निसें २८ गतेतक लुम्बिनी व भैरहवाय् ग्वसाः ग्वःगु मार्टय् सछि व न्यय्गू स्वयां अप्वः देय्या सहभागितालिसें स्वदेशी व विदेशी यानाः सछिम्ह वक्ता व पीम्हेसिया हाराहारीइ ब्लगतरं ब्वति काइगु जूगु दु ।

आतकया दुने दक्षिण एशियाली देय न्हय्गू देय्या पीगू निवेदन दुहां वये धुंकूगु ग्वसाः खलकं जानकारी बिउगु दु । संस्कृतिक, पर्यटन तथा नागरिक उड्डयन मन्त्रालयया स्वामित्व अन्तर्गतया नेपाल पर्यटन बोर्ड, पर्यटन सम्बद्ध सरकारी व निजी ख्यःया थीथी पर्यटन संघसंस्थाया कार्यक्रम कार्यान्वयन इकाइया रुपय् नेपाल एशोसियसन अफ टुर एण्ड ट्राभल एजेन्ट्स (नाट्टां) मार्टया आयोजना यायेत्यंगु खः ।

नेपालय् न्हापांखुी आयोजना जुइत्यंगु थ्व व्यावसायिक सम्मेलनं सकल पर्यटन व्यवसायी लगायत नेपाल पर्यटन ख्यःया हे छ्यं धस्वाकेगु नापं विश्व बजारय् तकं नेपाःयात बौद्ध पर्यटन केन्द्रया रुपय् स्थापित यायेत ग्वाहालि जुइगु विश्वास कयातःगु दु । नेपाःया पर्यटन बजाःया विस्तार व प्रवद्र्धन यायेत थुकथंया सम्मेलनं महत्वपूर्ण योगदान बीगु मार्ट मूल आयोजक समितिया सदस्य सचिव अच्युत शर्मा गुरागाइँ नं कनादिल ।

प्रधानमन्त्री केपी शर्मा ओलीं उलेज्या यानादीगु ज्याझ्वःया व्यावसायिक जमघट बीटुबी सत्रत भैरहवास्थित होटल टाइगर प्यालेसय् संचालन यायेगु ग्वसाः खलकं जानकारी बिउगु दु । ज्याझ्वलय् पर्यटनमन्त्री, प्रदेश नं. ५ या मुख्यमन्त्री, उद्योग, पर्यटन व वन तथा वातावरण मन्त्री नं सहभागि जुयादीगु जूगु दु ।

मार्टय् बौद्ध पर्यटनया लिसें व्यावसायिक पर्यटनया सहलह व अन्तक्र्रिया नं याइगु व सम्बद्ध विज्ञंपिंसं प्रस्तुति बियादी । थ्व ज्याझ्वलय् सरकारं घोषणा याःगु नेपाल भ्रमण वर्ष–२०२० यात सफल यायेत नं ग्वाहालि जुइगु विश्वास कयातःगु दु । मार्टया निंतिं निगू करोड च्यागू लाख खर्च जुइगु व उगु ध्यबा नेपाल पर्यटन बोर्ड छगू करोड व ल्यं दुगु नाट्टाया पहलय् थीथी संघसंस्थाया साझेदारीइ मुंकीगु जूगु दु ।

नेपाःया पर्यटन प्रवद्र्धनया निंतिं बौद्ध पर्यटकीयस्थल व सेवाया अन्तर्राष्ट्रिय क्रेता व राष्ट्रिय विक्रेता दथुइ सेवा व व्यापार विनिमयया अवसर सिर्जना यायेगु उद्देश्यं नेपालय् अन्तर्राष्ट्रियस्तरया मार्ट यायेत्यंगु खः । मार्टयात सफल यायेत पर्यटन मन्त्रालयया सचिव कृष्णप्रसाद देवकोटाया संयोजकत्वय् थीथी सरकारी व निजी पर्यटन ख्यःलिसे सम्बन्धित संस्थाया प्रमुख व प्रतिनिधितय् सहभागिता दुगु स्वीगुम्हेसिया मूल आयोजक समिति नं गठन याःगु दु ।

छुं दिं न्ह्यः थन छगू पत्रकार सम्मेलन यासें संयोजक देवकोटां स्वनिगलं पिने न्हापांखुसी थुकथंया तःधंगु ‘इभेन्ट’या रुपय् ग्वसाः ग्वयेत्यनागुलिं मार्टं नेपाल भ्रमण वर्षयात सफल यायेत ग्वाहालि जुइगु विश्वास प्वंकादिल ।

बोर्डया प्रमुख कार्यकारी अधिकृत दीपकराज जोशीं नेपाःया पर्यटनय् दूरगामि प्रभाव लाइगु मार्टयात आकिवं तक नं निरन्रता बिया वनेगु जुइ धयादिल । नाट्टाया अध्यक्ष सीएन पाण्डें पर्यटन ख्यःया हे महत्वपूर्ण ज्याझ्वःया रुपय् बौद्ध मार्टयात प्रभावकारी दयेकेत सरोकारवाला निकायलिसें समन्वययालिसें यायेत लगे जुयाच्वनागु न्ह्यथनादिल ।

सम्बन्धित बुखँ

LEAVE YOUR COMMENTS