लानिपुखुरु दयेकेगु बारे सहलह

येँ – लानिपुखू पुनःनिर्माणयात कयाः म्हिगः राष्ट्रिय सभागृहय् सहलह जूगु दु । सहलहया झ्वलय् येँ मनपाया मेयर विद्यासुन्दर शाक्य, उपमेयर हरिप्रभा खड्गी, पुरातत्व विभागया प्रतिनिधि, येँ मनपाया कार्यकारी अधिकृत धनीराम शर्मा, सम्पदा विभागया प्रमुखपिं दुथ्याःगु खः । सहलहया झ्वलय् लानिपुखू गथे यानाः दयेकेगु धइगु बारे दकलय् न्हापां पुरातत्व विभागं उकिया डिजाइन दयेकेगु व वयां लिपा समितिइ सहलह यायेगु खँ जूगु उपमेयर खड्गीं कनादीगु दु ।

वय्कलं धयादी ‘मौलिक कथं दयेकेगु धकाः खँ वःगुलिं यानाः प्रताप मल्लकालीन दयेकेगु वा लिपाया गुम्बज शैलीं दयेकेगु धइगु बारे सहलह जूगु दु ।’ लिसें म्हिगःया बैठकय् लानिपुखू दयकेगु निंतिं विज्ञतय् पुचलं बिउगु प्रतिवेदनयात कयाः सर्वोच्च अदालतय् मुद्दा तःगु जानकारी नं वय्कलं बियादीगु दु । तर थ्व मुद्दां यानाः लानिपुखू दयेकेत लिच्वः लाइ कि मलाइ धइगु ‘नेपालभाषा टाइम्सं’ न्यनागु न्ह्यसःया लिसलय् वय्कलं लिच्वः लाइ मखु धयादिल ।