तास म्हितेगु चलन गब्लेनिसें वल ?
तास थौंकन्हय् संसार न्यंकभनं हे म्हितू । थुकियात म्हाइपु छ्यायेत साप हे जिउगु साधन कथं नालातःगु दु । थ्व म्हतिं नं निम्ह व अप्वलय् च्याम्ह तक म्हिती । तासय् ५२ पाः दइ । तास म्हितेगु तरिका नं आः ला सलंसः हे दये धुंकल । ब्रिज (Bridge) तासया अन्तराष्ट्रिय कासा खः । तास म्हितेत कासाख्यः म्वाः । थ्व छेँय् हे म्हितेगु खः ।
गुलिं गुलिं मनूतय्गु धापूकथं तास म्हितेगु चलन मिश्रं वःगु खः । गुलि गुलिसियां धापूकथं धाःसा थ्व भारत वा चीनं हे शुरु जूगु खः । गुलिं ला अझ सन् ८०० लय् थ्व भारतय् शुरु जुयाः वयां सछिदँ लिपा यूरोपय् थ्यंकः वन धाइपिं नं दु । तर लिखित प्रमाण हे स्वयेगु खःसा इश्वीया झिंस्वगूगु शताब्दिइ हे तास यूरोपया थीथी मुलकय् म्हितेगु चलन वये धुंकुगु खः ।
अब्ले इमिसं थुकियात टेरोट्स (Terots) धकाः धाइगु खः । थुकी छुं कि छुं चित्र च्वयातःगु दइ, अले थ्व नीनिपाः जक दइ । लिपा वनाः थुकी एक्का, दुवा आदि थेंज्याःगु ५६ पाः कार्ड नं तयाबिल । अथे जूबलय् ७८ कार्ड जुल । वया लिपा फ्रान्सया मनूतय्सं ५२ पाः तासया छज्वः यानाः म्हितेगु यानाहल । थ्व ५२ पाः कार्डयात प्यताजिइ ब्वथल ।
छताजिया १३ पाः कार्डयात छता छता यानाः प्यता नां छुत । थ्व प्यता नां खः पान (Heart), चीर (Club), सुरोथ (Spade) व इँथ (Diamod) । वयां लिपा जर्मनतय्सं थुकी हाकनं सुधार यात, अले निग छ्यं दुम्ह चिंया रुपय् बादशाह, बेगम व गुलाम दयेकल । बादशाहया रुपय् विजेतायात, गुुलामया रुपय् सेनाया सेनापति व बेगमया रुपय् देवी पोमोनो, फ्लोरा, डायना व सेरेसयात चिंया रुपय् दुथ्याकल ।
थ्व हे ५२ पाः तास म्हितेगु चलन इंगल्याडय् नं शुरु जुल, अले अनं हे थ्व विश्व न्यंकभनं न्यनावन ।शुरु शुरुइ तासया चित्र ल्हातं पेन्टिगं याइगु खः । अथे जुयाः थ्व साप हे थिके । थिके जूगुलिं सामान्य मनूतय्सं ला थ्व न्यानाः म्हिते हे मफु । तर छपाईया कलाया आविष्कार जूसेंलिं यक्व हे कथंयागु बांबांलाःगु तास नं दंक दंक न्यायेगु दयावल ।
शुरु शुरुइ तास चाकलाःगु व प्यकुलाःगु जक दयेकाहइगु खः । थौंकन्हय् थुकिया स्टाण्डर्ड साहज ८½ हाकः व ब्या ५½ से.मी. खः ।
न्ह्यइपुकेत म्हितेगु ल्याखं तास बांमलाःगु चीज मखु । तर थौंकन्हय् थ्व जू म्हिते थें यक्व यक्व ध्यबा कयाः कयाः म्हितेगु यानाहःगु धाःसा साप हे बांमलाः । थुकिं ई व धन नितां बर्बाद जुइ ।
LEAVE YOUR COMMENTS