क्वःबुइँचाया छुं छुं खँ
क्वःबुइँचा मरुभूमिया देन खः । भारतया राजस्थानया सीमाना लिक्क लिक्क लाःगु लागाय् च्वंपिंसं बरोबर हे क्वःबुइँया प्रकोपया सामना याये मालाच्वं । थुमिगु ततःधंगु बथां गबलें गबलें तातापाकया लागाय् तक थ्यंकः वनी । पित्याःपिं क्वःबुइँतय्गु गुलिमछि किलोमीटर ताःहाकःगु बथान सर्गतय् ब्वयावइबलय् न्हिनय् हे खिउँसे च्वनावइ ।
थुमिसं दकलय् अप्वः किसानतय्गु नोक्सान याइ । थुमिसं बालि दक्व सखाप जुइक हे नयाबी । गनं वाउँक खन धाःसा थ्व क्वःबुइँचातय्सं अन त्वपू वनेधुंकी । भचा जायेकाः स्वयेबलय् अन बालि दक्व ध्वस्त जुइ धुंकी, सिमा दक्व नांगा जुइ धुंकी । क्वःबुइँचा वइगु वनीगुयात वर्षाया संकेत तायेकी ।
क्वःबुइँचात गुगु सिमाय् च्वनी, मेगु मौसमय् उगु सिमा तसकं बांलाइ । क्वःबुइँचाया बारे न्ह्याइपुगु तथ्य छगू थ्व दु कि इपिं ताः ई तक द्यांलाना च्वनेफु । थुपिं ४३ न्हु छुं हे नये–त्वने मयासे म्वानाच्वनेफु । तर थज्याःगु अवस्थाय् थ्यनकि इपिं ब्वये फइमखु अले इमिगु म्हया रंग नं हाकुयावनी । प्यन्हु न्यान्हु जक द्यांलात धाःसा चाहिं इपि ब्वयेफु ।
क्वःबुइँचां याकनं याकनं नयेफु । निगू ग्राम निसें निगूत्या ग्राम दुम्ह क्वःबुइँचां उलि हे तौलया नसा नयेफु । क्वःबुइँचातय्गु खि तसकं भिंगु साः खः । थुमिसं थःगु म्हय् दाः खाकातइ । थुकिं यानाः इपि माइलौं माइल तापाक ब्वःगु ब्वलं यायेफइ, अले नयेगु छुं मदुसां पित्याः सहयायेफइ । पित्याःपिं क्वःबुइँचातय्सं सिमाख्वला तकं सुचुक नयाबी ।
छक्वः तसकं दुखद घटना जूगु दु । छम्ह गांयाम्ह मिसा दुरु त्वंम्ह ह्याउँमंचा बुयाः बुँइ वंबलय् आकाझाकां क्वःबुइँचातय्गु हमला जुल । वयागु वाउँसे च्वंगु बुँ छगुलिं म्हासुसे खनेदत । व मिसा थः मचायात बुँया द्यामय् ग्वतुइकाः च्वाफि ज्वनाः ब्वाँय् ब्वाँय् क्वःबुइँचायत्त ख्याःवन । मचा चिल्लाय् चिल्लाय् दनाच्वन ।
तर व मिसां धाःसा भ्वय्भ्वय् कनाः क्वःबुइँचात निं ख्यानाच्वन । वं स्वये, मचायात बुँद्यामय् ग्वतुइका थकागुलिं ख्वःगु खः धकाः च्वन । लिपा मचायाथाय् थ्यंबलय् खन कंलाय् हे जक ल्यंदनि । अरब सागर हाचां गायाः ब्वया वनाच्वनीबलय् त्यानुया वलकि क्वःबुइँचातय्गु आत्मघाति पुचलं समुद्रय् थःपिंत दुंकाः लःया सतहय् थःपिनिगु म्ह छफी चिंक ल्यहें ल्यहें पुइकाबी ।
अथे जुइबलय् मेमेपिं त्यानुपिं क्वःबुइँचात व हे सीपिं क्वःबुइँचातय्गु म्हय् झासु लनी, अले त्यानु लनकि हानं ब्वयावनी । तसकं तजाःथाय् थ्यनीबलय् क्वःबुइँचात फय् गुखें न्ह्याःवनाच्वन, उखें हे ब्वया वनाच्वनी । अथे जुइबलय् इमि पपू संकाच्वने माली मखु । चीनियात धयापिं न्ह्यागु न्ह्यागु हे नइपिं खः ।
इमिसं क्वःबुइँचातय्गु तःता हे परिकार दयेकाः नयेगु याः । खला मेमेगु देय्यापिं मनूतय्सं नं क्वःबुइँचा नः । पाकिस्तान व थीथी अरब मुलुकय् नं क्वःबुइँचाया थीथी परिकार दयेकाः नयेगु याः। थुकी शतप्रतिशत प्रोटीन दइ । क्वःबुइँया छ्यं, तुति व पपू वांछ्वया मेगु दक्वं नयेत ज्या काइ । झीथाय् नेपालय् क्वःबुइँचा भाजनय् गंक सियाः नयेगु चलन दु ।
LEAVE YOUR COMMENTS