ज्यानमारा सिमा

स्वांसिमां झीत सासः ल्हायेत माःगु अक्सिजन बी । थ्व झी सकसिनं सिउगु हे खँ खः । गुलिसिनं सिमायात द्यः भाःपाः पुज्यायेगु नं याः । अझ गां गामय् ला ताल्लां सिचुकेत ततःमागु सिमा क्वय् च्वनेगु नं याइ । तर छुं सिमा धाःसा मनूया ज्यानया निंतिं तसकं ग्यानापु । अज्याःगु हे सिमामध्ये छमा सिमाया नां खः सरबेरा आडोलम ।

थ्व सिमा स्वयेबलय् अतिकं यइपुसे च्वं, मनूयात स्वाभाविक रुपं आकर्षित नं यायेफु । अथे खयां नं थ्व सिमा मनूया निंतिं थुलि ग्यानापु कि थ्वं ज्यान तकं कायेयः । थ्व सिमाया न्ह्यःने वंपिं मनूतय् ज्यान जोखिमय् लायेगु यानाच्वंगु दु । तसकं विषालु थ्व सिमाया कारणं प्रत्येक हप्ताय् छम्ह छम्ह मनू सिनाच्वंगु दु ।

वैज्ञानिकतय् कथं विश्व दइगु आपालं विषालु सिमा मध्ये थ्व दकलय् ग्यानापुगु व विषालु सिमा खः । थ्व सिमां पिहां वइगु नस्वाः मनूया म्हय् दुहां वनेवं वयागु मुटुया धड्कन अप्वया वनी । अनं लिपा वाक वाक वइ, छ्यं स्याइगु, इक्कुसे च्वनी जुइ । थुकिं यानाः नुगःचुया ज्या यायेगु प्रणालीयात हे लिच्वः लाकीगु व थुकिया विष मनूया म्हय् दुहां वनाः गुगुं विषालु इन्जेक्सनं थें ज्या याइगुलिं मनूया मृत्युया कारण जुइगु वैज्ञानिकतय् धापू दु ।