थिमिइ बिस्काः पुजाय् सीमित याइगु

थिमि– मध्यपुर थिमि नगरपालिकां नगरक्षेत्र दुने हनीगु बिस्काः जात्रा थुगुसी द्यः पुज्यायेगुली जक सीमित यायेगु क्वःछिउगु दु । नगरपालिकाया कार्यपालिकाया आकस्मिक बैठक च्वनाः कोरोना भाइरस संक्रमण जुइके मबीत बिस्काः जात्रा पुजाय् जक सीमित यायेगु क्वःछिउगु खः ।
अथेहे नगरपालिकां स्वंगू करोडया नगर विपद् कोष नं स्थापना याःगु दुसा नगरपालिका दुने लाःगु गुंगुलिं वडाया वडाध्यक्षया संयोजकत्वय् न्यागू न्यागू लाख तकाया वडा विपद् कोष नं दयेकूगु दु ।

मध्यपुर थिमि नगरपालिकाया मेयर मदनसुन्दर श्रेष्ठं वडा मार्फत खाद्यान्न आपूर्ति, राहत व्यवस्थापन व वितरण कमिटी गठन यानाः कोरोनालगायतया विपद् पीडितपिंत राहत वितरण यायेगु जानकारी नं बियादीगु दु ।

अथेहे नगरपालिकाय् दुने विदेशं लिहां वयाः च्वनाच्वंपिंथाय् स्वास्थ्यकर्मी व जनप्रतिनिधि छ्वयाः स्वास्थ्य परीक्षण याकागु खँ नं वय्कलं धयादीगु दु । अथेहे नगरपालिकां संचालन याना वयाच्वंगु नेपाल कोरिया मैत्री नगरपालिका अस्पतालय् कोरोना संक्रमणया उपचार यायेत पूवंक तयारी यानाःगु व थन २४ घन्टा हे चिकित्सक सहितया स्वास्थ्यकर्मी व आइसोलेटेड एम्बुलेन्सया व्यवस्था यानागु खँ नं नगरप्रमुख श्रेष्ठं धयादीगु दु ।