यल पञ्जरां
बौद्धमार्गी नेवाःतय् दकलय् तःधंगु नखः पञ्जरां अर्थात पञ्चदान स्वनिगलय् दँय्दसं गुंलाय् निक्वः हना वयाच्वंगु दु । न्हापांगु गुंलाथ्व अष्टमीकुन्हु यलय् जक न्यायेकीगु ‘यल पञ्जरां’ खःसा लिपांगु यंलागा त्रयोदशीकुन्हु येँ व ख्वपय् न्यायेकीगु पञ्जरां खः । थ्वयात जुगः नं धाः ।
श्रावण शुक्ल अष्टमी तःधंगु पर्वदिं खः । परापूर्वकालय् थुकुन्हु दक्वसिबें न्हापां ब्रम्हां थःत मुलगु छ्यं महाद्यःयात ध्यंकाः दीपंकर व बुद्ध भगवानयात दान यानाबिज्यात धकाः न ेपाल वर्ष क्रिया नांया सफुलिइ च्वयातःगु दु ।अथेहे कपिदावदान जातकमालाया छगू अंश सर्वानन्द नृप जातक बाखंकथं त्रैतायुगय् दीपाली नगर (यलया गुइत) य् सर्वानन्द जुजुं थःगु लाय्कुलिइ दीपंकर तथागत व वय्कःया शिष्यपिंत ब्वनाः पिण्डपात्र दान (पञ्चदान)यात । उबलय् निसें थ्व परम्परा न्ह्यात धाइ ।
सर्वानन्द जुजु पूर्वजन्मय् किंशुक वनय् वोधिसत्वया रुपय् ज्ञानाकर माकः जुयाः जन्म जुल । श्रावणशुक्ल अष्टमी (गुंलाथ्व अष्टमी) कुन्हु भिक्षाटन याःबिज्याःम्ह दीपंकर तथागतयात फसि दान यानाः फुक्क माकःतय्त उद्धार यात । अनंलि सीधु.काः कामार्थी नगरय् भुवनानन्द सार्थवाहुया काय् धर्मश्री बालक धायेकाः जन्म जुयाः गुदँ क्यंबलय् श्रावण शुक्ल अष्टमीकुन्हु भिक्षाटन याःबिज्याःम्ह श्री दीपंकर तथागतयात थः म्हिताच्वंगु पांशु (धू) पिण्डपात्रय् तया ब्यूबलय् थीथी अन्न जूगु जुल । अनंलि धर्मश्री बालक सीनाः दीपाली÷दिपावती नगरय् सुशीलानन्द जुजुया कायया रुपय् जन्म जुयाः सर्वानन्द जुजु कथं नांजाल । वसपोलं दकलय् न्हापां गुंलागा त्रयोदशी कुन्हु पिण्डपात्र दान यात । व्रम्हचारी दुखीम्ह मिसा लक्ष्मी थकुं व जुजुं हाकनं श्रावण शुक्ल अष्टमीकुन्हु दीपंकर तथागत व आर्य भिक्षु संघयात पिण्डपात्र दान यानाः पञ्जरां यायेगु परम्परा न्ह्याकाथकल । सर्वानन्द जुजुं दयेका थकूगु गुइत बहीली दँय्दसं सापारुकुन्हु गुइत अजि (लक्ष्मी थकुं)या प्रतीमा व वय्कलं छ्यःगु छुं छुं हलंज्वलंत ब्वयेगु यानाच्वंगु दु ।
यल पञ्जरां हनेगु झ्वलय् न्हय्कुन्हु शाक्य, वज्राचार्यपिनि छेँय् छेँय् सुचिनीचि याइ । थःथःगु छेँय् व बहाःबहिली दिपंकर तथागत, लोकेश्वर, तारा व भगवान द्यः, चीभाःद्यः आदि द्यःपिं लिसें इलां प्यनाः पौभाः ब्वयाः झःझः धायेक मत च्याकाः द्यः ब्वयाः स्तोत्र पाठ याइ । कन्हय्कुन्हु सुथ न्हापां द्यः पुज्याइ । पञ्जरां काःवःपिं धाक्वसित ब्वयातःम्ह द्यःपिं क्वसं तयाः पुज्यानाः सिन्हः तीकाः पाय्स (खीर), सहवाजाकि, बूबः, गुलुपाः आदि दान याइ । न्हापा येँय्, ख्वप व भ्वँतय् च्वंपिं शाक्य, वज्राचार्यपिंसं यल पञ्जरां काःवनेगु चलन दु । थीथी बहाःबहीली समय्द्यः बहिद्यः ब्वयाः पञ्जरां बी । थौंकन्हय् हिरण्यवर्ण महाविहारय् मुनाः छेखपतिं थःगु गच्छेकथं सहवाजाकि, छ्व, ग्वमाय्, चिग्वःगु कय्गू, चि व गुलुपाः तयाः पञ्चदान बीगुलिं थन न्हिछि हुल जुइ । पञ्जरां गुथि दुपिंसं गुथिपाखें पञ्जरां बी । संन्याकाई जुइवं थःथःगु लागा कथं फुद्यः जात्रा याना हयेवं ल्यं दुगु दक्व अन्न फुद्यःयात छानाः पञ्जरां क्वचायेकी । थुकुन्हु बरे छुइ धुंकूपिं शाक्य, वज्राचार्यतय्सं म्होतिं नं न्हय्खा छेँय् पञ्जरां कायेमाः धाइ ।
थुकुन्हु यलंनिसें येँय् स्वयम्भू भगवानद्यःयाथाय् नौबाजा थानाः द्यइके वइगुलिं स्वयम्भुइ म्वःम्वः मनूत दइ । येँय्, यल पञ्जरां कुन्हु निगःचा क्वाति फयाः न्हिन्हिं सुथ न्हापां लः हिलाः, गुपुन्हिु कुन्हु चुलि जाःगु क्वाति क्वाति दायेकेगुलि ल्वाकछ्याइ ।
बौद्धधर्म परम्परा कथं पञ्चदान÷पञ्जरांयात महादानकथं कयातःगु दु । जीवनय् मदयेकं मगाःगु वस्तु दान याइगुलिं थ्वथे तःधंगु दान मेगु मदु । थुकुन्हु शाक्य, वज्राचार्यतय्त दीपंकर तथागतया रुपय् पुज्यानाः पञ्चदान यात धायेवं सुख, ऐश्वर्य प्राप्त जुयाः सीधुंकाः सुखावति भुवनय् बास लाइ धाइ । अथेहे शाक्य, वज्राचार्यपिंसं पञ्चदान कायेगु झ्वलय् बौद्ध स्तोत्र,धारणी ब्वनाः पञ्जरां काइ । दाताया छेँय् अष्ट महाभय मदयाः सुख, शान्ति, ताः आयु आयोग्य व समृद्धिया कामना याइ ।
ग्वाहालि ज्वलं
१) वज्राचार्य, चुन्दा ११२०, नेवाm तजिलजिइ नखःचखः । येँ ः नेपालभाषा एकेदेमि, पौ ४८
२) वज्राचार्य, प. वै. आशाकाजी १०८९, सर्वानन्द नृप जात कथा । यल ः हर्षज्योति शाक्य्
३) न्यनेकने ः अनिता वज्राचार्य, न्याखाचुक, यल ६० दँ ।
LEAVE YOUR COMMENTS