ओलीं नेकपा (एस) सिधयेकेत्यंगु द्वपं

येँ (नेपालभाषा टाइम्स)-नेकपा (एकीकृत समाजवादी) या अध्यक्ष लिसें पुलांम्ह प्रधानमन्त्री माधव नेपालं एमाले अध्यक्ष केपी शर्मा ओलीं थःगु पार्टीयात हे मदयेकेगु षडयन्त्र यानाच्वंगु द्वपं बियादीगु दु । पार्टीलिसे सतीगु नेपाल भूतपूर्व सैनिक तथा प्रहरी संगठनं म्हिगः येँय् ग्वसाः ग्वःगु ज्याझ्वलय् न्ववायेगु झ्वलय् वय्कलं उगु खँ धयादीगु खः ।

अध्यक्ष नेपालं थःगु पार्टीयात सिधयेकेगु ज्या क्रान्तिकारी मजुइगु खँ धासें थःपिं दुथ्याःगु गठबन्धनयात ध्वस्त यायेगु कुतः जुयाच्वंगु व अज्याःगु षडयन्त्र फायाः न्ह्याः वनेमाःगु खँ नं धयादीगु दु ।

वय्कलं गठबन्धनया भर परे जुयाः चुनाव त्याके मफइगु खँ धासें थःगु शक्ति बल्लाकाः याकःचा हे चुनाव ल्वायेगु निंतिं न्ह्याः वनेमाःगु खँ नं धयादीगु दु । उकथं हे अध्यक्ष नेपालं प्रतिगामी शक्तितय्सं चलखेल यानाच्वंगु धासें उकिया विरुद्ध न्ह्याः वनेमाःगु खँ नं धयादीगु दु ।