सक्वया अश्वखुसि पुलांगु हे स्वरुपय् हयेगु कुतः

येँ(नेपालभाषा टाइम्स)- येँया उत्तर पूर्वी क्षेत्रय् च्वंगु धार्मिक, सांस्कृतिक ऐतिहासिक महत्वया सक्व देशय् च्वंगु अश्वखुसियात पुलांगु संरचनाय् लित हयेगु निंतिं कुतः शुरु जूगु दु । खुसियात लिकुंका यंकेगु स्वयां नं पुलांगु हे स्वरुप व संरचनाय् लित हयेगु निंतिं कुतः शुरु जूगु खः ।

अश्वखुसियात सक्वया छगू महत्वपूर्ण खुसिकथं नं कायेगु याः । कृषि प्रधान क्षेत्रया रुपय् परिचित सक्वया अभिन्न अंगया रुपय् दयाच्वंगु थ्व खुसिया अस्तित्व ल्यंका तयेत स्थानीयत दत्तचित्त जुयाः लगे जुयाच्वंगु दु । विकासया नामय् जुयाच्वंगु थीथीकथंया क्रियाकलापया झ्वलय् अश्वखुसियात नं लिकुंका यंकेगु नापं अस्तित्व हे मदयेका छ्वयेगुकथंया कुतः जुयाच्वंगु इलय् खुसियात पुलांगु हे स्वरुपय् लित हयेगु कुतः जुयाच्वंगु खः ।

थौंकन्हय् चिब्या जुयाः नां जकया खुसि जुयाच्वंगुयात स्थानीय सरकार, स्थानीयवासि व जग्गाधनीतकं जानाः २०२१ सालया नापीइ कायम यानातःकथं खुसियात न्हापा थें हे तब्या यायेगु ज्या जुयाच्वंगु दु । करिब २ किलोमिटर स्वयां ताःहाकःगु खुसिइ डोजर चले यानाः पुलांगु हे प्राकृतिक स्वरुप व संरचनाय् हयेगु ज्यायात तीव्रता बिया वयाच्वंगु दु ।