नेपाः-भारतया माेबाइल खुँतय् दथुइ सहकार्य

येँ – नेपालय् खुया यंकीगु मोबाइल फोन लिपा हानं ज्वनीगु सम्भावना पिहां वइगु जूगुलिं आः मोबाइल खुइपिं खुँतय्सं अज्याःगु फोन फुक्क भारतय् यंकाः मीगु शुरु याना हःगु खँ सीदुगु दु ।

नेपालय् चोरी जुइगु मोबाइल फोन लिपा प्रहरीपाखें आईएमई नम्बरपाखें पत्ता लगे यानाः ज्वनेगु नं यानाच्वंगु दु । तर खुया यंकूगु मोबाइल यंकाः भारतीय बजारय् मिया बिल धाःसा उकियात अथे यानाः नं ज्वने मफइगु खँ धाःगु दु ।

उकथं हे भारतय् खुया हइगु मोबाइल फोन नं थौंकन्हय् नेपालय् हयाः मीगु जुयाच्वंगु दु । भारतय् नं खुया यंकूगु मोबाइल लिपा प्रहरीपाखें पत्ता लगे यानाः ज्वनीगु जूगु कारणं उमिसं नं थःथाय् खुया काइगु मोबाइल नेपालय् हयाः मीगु जुयाच्वन ।
थथे नेपालं खुया यंकीगु मोबाइल भारतीय बजारय् मीगु व भारतय् खुया हइगु मोबाइल नेपाःया बजारय् हयाः मीगु लागिं निगुलिं देशया मोबाइल खुँतय् दथुइ सहकार्य समेत जुयाच्वंगु खँ नं सीदुगु दु ।

आः नकतिनि भारतं खुया हःगु सलंसःगः मोबाइल हयाच्वंगु ज्वंगु इलय् तिनि नेपाल प्रहरीं थ्व खँ सीकूगु खः । थौंकन्हय् नेपालय् ज्वनीगु मोबाइल फोन प्रहरीं नं पत्ता लगे याये मफयाच्वंगु कारण थथे हे जुइमाः धाःगु दु । अथे हे भारतय् नं खुया यंकूग मोबाइल पत्ता लगे मजुइगु कारण थ्वहे खः ।
थौंकन्हय् नेपालय् दँय् करिब १० हजारगः तक मोबाइल खुया कायेगु ज्या जुयाच्वंगु दु । उकी मध्ये करिब द्वःछिगः जक हे हानं ज्वनीगु जुयाच्वंगु दु । मेगु ९ हजार गः बेपत्ता हे जुइ ।
भारतय् खुया काइगु मोबाइल ग्वलंगः नेपालय् हयेगु ज्याय् सीमापारी लागाय् चले जुइगु गाडी व्यवसायीतय्सं यानाच्वंगु खँ नं सीदुगु दु ।
खास यानाः गाडी चले याइपिं चालक व खलासीतय्सं हे थथे भारतय् खुया काइगु मोबाइल येँय् हयेगु यानाच्वंगु दु । थौंकन्हय् भारतं नेपाः दुहां वइगु गाडीइ धमाधम मोबाइल ज्वनेगु जुयाच्वंगु कारण नं थ्वहे खः ।
अथे हे नेपालय् खुया काइगु मोबाइल नं थथे हे लँपु जुयाः भारतय् यंकाः मीगु जुयाच्वंगु दु ।