हलिउड अस्वीकार !

बलिउड नायिका प्रियंका चोपडा थौंकन्हय् हलिउडय् व्यस्त जुयाच्वंगु दु । प्रियंका लिपांगु इलय् बलिउड स्वयां हलिउडय् हे अप्वः मस्त व व्यस्त जुयाच्वंगु दुसा छगू इलय् ‘बलिउड क्वीन’या रुपय् चर्चित ऐश्वर्या रायं नं हलिउडय् बांलाःगु चर्चा मुनेत सफल जूगु खः । ऐश्वर्यां ‘ब्राइड एण्ड प्रिजुडिस’ नांया संकिपापाखें हलिउड फिल्म उद्योगय् डेब्यू याःगु खः ।

थ्व हे ऐश्वर्याया हलिउड करिअरयात कयाः लिपांगु इलय् छगू न्हूगु खँ पिहां वःगु दु । खँ छुं दिं न्ह्यःया खः । छगू रिपोर्टकथं ऐश्वर्यायात हलिउडया सुपरहिट छगू संकिपा ‘ट्राय’या निंतिं अफर याःगु जुयाच्वन । हलिउडया चर्चित अभिनेता ब्राड पिटया मुख्य भूमिका दुगु संकिपाय् म्हितेगु अवसर ऐश्वर्यायात वःगु खःसा वं उगु संकिपाय् म्हितेत अस्वीकार याःगु खँ पिहां वःगु दु ।

हलिउडया चर्चित अभिनेता ब्राडलिसे म्हितेत आखिर ऐश्वर्यां छाय् अस्वीकार यात धइगु खँ चर्चाय् वयाच्वंगु दु । ऐश्वर्यां थुगु संकिपायात अस्वीकार याःगु छगूयां छगू जक कारण धइगु संकिपाय् दुगु अन्तरंग दृश्य खः । संकिपाय् ऐश्वर्यायात गुगु भूमिकाया निंतिं अफर याःगु खः, उगु भूमिका याइम्हेसिनं अन्तरंग दृश्य नं बीमाःगु जुयाच्वन । थ्व हे कारणं ऐश्वर्यां उगु संकिपाय् म्हितेत अस्वीकार याःगु खः ।