नेपालभाषा स्टार म्युजिक अवार्डया टप टेन घोषणा

यल – वरिष्ठ संगीत साधक अमरराज शर्मायात वय्कलं नेपालभाषा सांगीतिक ख्यलय् बियादीगु ज्वःमदुगु योगदानयात कयाः ‘लाइफ टाइम एचिभमेन्ट अवार्ड’ पाखें सम्मान याइगु जूगु दु । संसार क्रियसन्सया ग्वसालय् जुइगु नेपालभाषा स्टार म्युजिक अवार्ड–२०१९य् वय्कःयात उगु सम्मान लःल्हायेत्यंगु खः ।

क्रियसन्सपाखें अवार्डय् टप टेनय् लायेत सफल जूपिनिगु नां धलः सार्वजनिक यायेगु झ्वलय् उकिया जानकारी बिउगु खः । लिसें अवार्डया निंतिं थीथी विधाय् टप टेनय् लायेत सफल जूपिनिगु नां नं सार्वजनिक याःगु दु ।

नेपालभाषा संगीतिक ख्यलय् हे दकलय् अप्वः विधाय् अवार्ड लःल्हाइगुकथं चर्चाय् वयाच्वंगु थुगु अवार्डया निंतिं ५७ गू म्युजिक भिडियो दुहां वःगुलिइ अन्तिम चरणया निंतिं उत्कृष्ट झिगू म्युजिक भिडियोया ल्यज्यालिसें टप टेनय् लाःपिनिगु नां सार्वजनिक याःगु खः । अवार्डया निंतिं थीथी विधाय् उत्कृष्ट झिगुलिइ लायेत सफल जूपिंत थौं हे छगू ज्याझ्वःया दथुइ दसिपौलिसें मेडल नं लःल्हाइगु ज्याझ्वः दु ।

अथे हे संसार सप्तरंगी अवार्डपाखें नेपालभाषा संकिपा व सांगीतिक ख्यःया नांजाःपिं म्येँ हालामि जुजुकाजी रंजित, संगीतकार मनराजा नकःमि, नायिका हिसिला महर्जन, वरिष्ठ सिने पत्रकार विजयरत्न असंबरे, निर्देशक पवन जोशी, नायक जय श्रेष्ठ, मेकअप आर्टिष्ट सनमकुमार श्रेष्ठयात व संसा मल्टिप्रपाज अवार्ड ललेन्द्र शाक्यात लःल्हाइगु जूगु दु ।

थुगु अवार्डयात प्रमोसन यायेकथं थ्व हे वइगु मंसिर २८ गते संकिपा व सांगीतिक ख्यःया कलाकारत दुथ्याकाः नेवाः आर्टिष्ट फुटसल कासा यायेत्यंगु दु ।

 

सम्बन्धित बुखँ

LEAVE YOUR COMMENTS