शरणार्थीतय् विलाशी जीवन

स्थानीय नेपाःमि स्वयां भूटानी शरणार्थी तःमि !

येँ – भूटानं पितिना हयाः नेपालय् शरण काः वःपिं अधिकांश भूटानी शरणार्थीत मध्ये आः छुं भचा हे जक झापाया शरणार्थी क्याम्पय् च्वनाच्वंगु दनि । तर उपिं झापाय् शरणार्थी जुयाः च्वनाच्वंपिं खःसां उमिगु जीवनस्तर धाःसा अन हे च्वंपिं स्थानीय नेपाःमि स्वयां तसकं थहां वनाच्वंगु दु ।

अथे जूगुया कारण खः, अमेरिका लगायत पश्चिमा देशय् समायोजन यायेयंकूपिं उमि थःपितिपिंसं छ्वया हइगु ध्यबा । झापाय् च्वनाच्वंपिं करिब छगू लाख भूटानी शरणार्थीयात भूटानं लित मसःतूगु व नेपालय् नं लही थाकुगु कारणं यानाः अन्तर्राष्ट्रिय पहल स्वरुप उमित अमेरिका, बेलायत, क्यानाडा व अष्ट्रेलियाय् समायोजन यायेयंकूगु खः ।

झापाया थीथी च्यागू शरणार्थी क्याम्पय् च्वंपिं ९० प्रतिशत शरणार्थीतय्त स्वंगूगु मुलुकय् तये यंकूगु दुसां आः द्वःबद्वः शरणार्थी जक झापाय् च्वनाच्वंगु दनि । झापाय् थौंकन्हय् निगू जक शरणार्थी क्याम्प दनि । आपालं शरणार्थी विदेश वनेधुंकूगुलिं झापाया शरणार्थी क्याम्प थौंकन्हय् सुनसान खनेदु ।

तर झापाय् ल्यं दुपिं थ्व शरणार्थीत थःगु देश लिहां वने मखंसां थौंकन्हय् उमिगु जीवनस्तर धाःसा गाक्कं थहां वनाच्वंगु दु । थौंकन्हय् क्याम्पय् च्वंपिं फुक्क धइथें शरणार्थीतय्के थिकेगु मोबाइल, ल्यापटब, कम्प्युटर दु । थज्याःगु ग्याजेटं यानाः विदेशय् च्वंपिं थःपिनिपिंलिसे उमित स्वापू तयेत नं थाकु मजू ।

पिनें यक्व दुहां वयाच्वंगुलिं अधिकांश शरणार्थीतय्के आः मोटरसाइकल दु । गुलिसिके ला गाडी तकं दु । उमिगु जीवनस्तर स्थानीय नेपाःमि स्वयां थहां वनाच्वंगु दु । क्याम्पय् च्वंपिं आपालं शरणार्थीतय्त स्वंगूगु मुलुकय् पुनर्वासया व्यवस्था यायेधुंकूगुलिं आः शरणार्थी सम्बन्धी अन्तर्राष्ट्रिय संघसंस्थातय्सं उमित ग्वाहालि यायेगु नं बन्द यायेधुंकल ।

अन्तर्राष्ट्रिय संस्थातय्सं ग्वाहालि बन्द याःगुलिं छगू इलय् शरणार्थी क्याम्पय् च्वंपिं शरणार्थीत द्यांलाये माःगु तकं अवस्था वःगु खः । तर थौंकन्हय् अन्तर्राष्ट्रिय ग्वाहालि व नेपाः सरकारपाखें नं छुं हे व्यवस्था मयाःसां क्याम्पय् च्वंपिं शरणार्थीतय्त छुं थाकुगु अवस्था धाःसा मदु । उमिगु जीवन स्थानीय नेपाःमि स्वयां नं बांलाक चले जुयाच्वंगु दु ।

नेपालय् ल्यं दुपिं छुं भचा शरणार्थीतय्त भूटान लित यंकेगु धकाः आः नं कुतः जुयाच्वंसां भूटानं धाःसा अझ नं उमित लित यंकेत आनाकानी हे यानाच्वंगु दनि । उमित लित यंकेत नेपालं याःगु आग्रहयात भूटान सरकारं हानं नं अस्वीकार याःगु खः । आः उमिगु भविष्य छु जुइ धइगु खँ अझं अनिश्चित हे जुयाच्वंगु दनि ।

सम्बन्धित बुखँ

LEAVE YOUR COMMENTS