बञ्चरेडाँडाय् ज्या न्ह्यात

येँ – येँया फोहोर व्यवस्थापन यायेत ल्ययातःगु बञ्चरेडाँडा ल्याण्डफिल साइट दयेकेगु ज्या न्ह्याःगु दु । अन ल्याण्डफिल साइट दयेकल धाःसा न्यय्दँया निंतिं फोहोर व्यवस्थापन याये फइगु खँ धाःगु दु । शहरी विकास तथा भवन निर्माण विभागं ठेकेदार कम्पनीपाखें ज्या न्ह्याकूगु खः । ल्याण्डफिल साइट निगू चरण यानाः क्वचायेकीगु योजना दु ।

न्हापांगु चरणया ज्या लुम्बिनी–कोशी एण्ड न्यौपाने जेभीं दछिया दुने क्वचायेकेगु कथं शुरु याःगु खः । न्हापांगु चरणय् पूर्वाधार दयेकेगु ज्या याइ । थुकी ल्याण्डफिल साइट तक सतक दयेकेगु, अन छ्यलीगु सामानया परीक्षण यायेगु व मतया लाइन हयेगु ज्या जुइ । अस्थायी संरचना दयेकेगु निंतिं सतक निर्माणया ज्या जुइधुंकूगु दुसा साइट दयेकेगु निंतिं छ्यलीगु सामग्रीया गुलिखे परीक्षण जुइधुंकूगु दु ।

लिसें ल्याण्डफिल साइटया निंतिं माःगु भवन दयेकेगु ज्या नं जुयाच्वंगु दु ।उगु थासय् मत मदुगुलिं विद्युत प्रशारण लाइन विस्तार यायेगु निंतिं खरिद प्रक्रिया नं न्ह्यायेधुंकूगु दुसा मेगु दँया असार दुने न्हापांगु चरणया ज्या क्वचायेकेगु तयारी कथं ज्या जुयाच्वंगु दु ।

 

सम्बन्धित बुखँ

LEAVE YOUR COMMENTS