लगंया कीर्तिपुण्य महाविहारया आगं छेँया जग स्वन

येँ (नेपालभाषा टाइम्स) – येँ महानगर पालिका वडा नं. २१ लगंस्थित कीर्तिपुण्य महाविहारया आगं छेँ पुनःनिर्माणया निंतिं जग स्वनेगु ज्या जुल । येँ महानगरपालिकाया मेयर विद्यासुन्दर शाक्यं वंगु माघ २ गते धार्मिक विधिकथं पुजा यासें महाविहारया आगं छेँया जग स्वनादीगु खः ।

ज्याझ्वय् नवासें महानगर प्रमुख शाक्यं येँ देय् ऐतिहासिक, धार्मिक, सांस्कृति शहर जूगु धासें थनया आपालं अज्याःगु सम्पदात ताःई न्ह्यवंनिसें जीर्ण अवस्थाय् लानाच्वंगु दु धयादिल । अज्याःगु सलंसः सम्पदा पुनःनिर्माण यायेमाःगु आवश्यक जूगु खँय् बः बियादिसें वय्कलं येँया मूर्त अमूर्त सम्पदा संरक्षणया निंतिं महानगरपालिका एकाग्र जुयाः न्ह्यचिला च्वंगु दु धयादिल ।

पुनःनिर्माण यायेमाःगु आपालं सम्पदाया स्वामित्वयात कयाः विवाद जुयाच्वंगु धासें महानगर प्रमुख शाक्यं धयादिल, ‘छुं छुं थासय् निकायगत समन्वया अभाव खने दयाच्वंगु दु । अज्याःगु सम्पदायात अथें त्वःता बीगु खत धाःसा जीर्ण जुयाच्वंगु अज्याःगु सम्पदा लिपा वनाः भग्नावशेषय्हि ला वनी । अज्याःगु अवस्था झीसं स्वयाच्वने फइमखु । उकिं विवादयात छखे तयाः जूसां मर्मत, सम्भार व पुनःनिर्माणयात प्राथमिकता बिया वयाच्वनागु खः ।’

येँया प्रमुख झिंच्यागू महाविहारमध्ये छगू प्रमुख महाविहारकथं धयातःगु कीर्तिपुण्य महाविहार प्राचीनकालय् दक्षिण कोलिग्राम सभ्यतालिसें परिचित व बुद्धशासनकाललिसे स्वानाच्वंगु महत्वपूर्ण विहार खः । ज्याझ्वलय् स्थानीयवासीलसें महाविहारया दुजः कुलभक्त शाक्य, महाविहार संरक्षण समितिया सुगन्धरत्न शाक्यं नं नुगःखँ तयादीगु खः । उगु आगं छेँ येँ महानगरपालिका हनुमानध्वाखा दरवार क्षेत्र संरक्षण कार्यक्रम अन्तर्गत निगू करोड ८५ गू लाख लागतय् पुनःनिर्माण यायेत्यंगु खः ।