जगतसुन्दरय् वेबपेज डिजाइन तालिम

येँ- जगतसुन्दर ब्वनेकुथिइ वुमेन इन आइटी कमिटीया ग्वसालय् झिन्हुया वेबसाइट डेभलपमेन्ट व आइसीटी अवर्नेस क्याम्पेन जुल । ब्वनेकुथिया च्यागूनिसें झिगू तगिंया मिसा मस्तय्सं ब्वति काःगु खः ।भविष्यय् मिसातय्त नं आइटी सम्बन्धी ज्या यायेगुलिइ प्रोत्साहित यायेगु ल्याखं न्ह्याकूगु कार्यशाला गोष्ठिपाखें ब्वनेकुथिया ब्वँमिपिंसं वेबपेजया डिजाइन यायेगु ज्या सयेकूगु खः । ज्याझ्वलय् प्रविधिया युगय् इन्टरनेट थौं अत्यावश्यक जूसां थुकिं जुइगु फाइदा व बेफाइदाया बारे नं जानकारी बिउगु खः ।

समापन ज्याझ्वलय् क्यान फेडेरेसनया अध्यक्ष हेमन्तकुमार चौरासिया, महासचिव रंजित पोद्दार, डब्लुआइटी कमिटीया अध्यक्ष रत्नतारा वैद्य, दुजःपिं गुणेश्वरी प्रधान, अञ्जना लोहनी, रेमा राजभण्डारी, रोजा वासुकला, शीला कार्की लगायतपिं पाहांकथं झायादीगु खः ।

ज्याझ्वलय् क्यानया अध्यक्ष चौरासियां लिपा हाकनं मिसा ब्वँमिपिं नापनापं मिजं ब्वँमिपिं नं दुथ्याकाः याकनं मेगु छगू ज्याझ्वः न्ह्याकेगु जानकारी बियादिल । डब्लुआइटी अध्यक्ष वैद्यं थःपिंसं विचाः यानाथें ब्वँमिपिंसं बांलाक सयेकूगुलिं थःपिं नं अतिकं लय्ताःगु खँ कनादिल ।

तालिम सन्जु आचार्यं बियादीगु खःसा ब्वनेकुथिया स्यनामिपिं आशिष मानन्धर व सबिन रानामगरं ग्वाहालि यानादीगु खः । उगु हे ज्याझ्वलय् वेबपेज डिजाइन यानादीपिं मध्ये न्याम्हेसित सिरपाः नं लःल्हाःगु खः ।