नुगलय् स्वच्चाःम्ह जामनः गुभाजु
प्रतिसरा सायमि
नेवाः श्रष्टापिंत बजाः मदु धाइ, तर भिजुअलया बजाः जिं स्वये गाक्कं क्वाः थें च्वं । छाय्धाःसा थौंकन्हय्या नेवाः मांअबुं थःगु मांभाय् ल्हात धाःसा मेपिं मस्त स्वयां चलाख मजुइ धकाः ब्वलंकूपिं मस्त नेवाः भाय् ब्वने, च्वये, ल्हायेगुलिइ जकं ल्हाः लिसाः, तर स्वयेगुलिइ उपिं लिपा मलाः, एक्सनं उमिसं थुइकेफु ।
थ्व खँ जिं ‘जामनः गुभाजु’ ऐतिहासिक संकिपाया न्हापांगु प्रिमियर शो स्वयेगु अवसरय् वाःचायेकागु खः । अन थौंकन्हय्या ल्याय्म्ह ल्यासे पुस्ताया गाक्कं हूल जिं खना, अले जिगु लिउनें थीथी भुनुभुनु सलं थःपिसं मथूगु खँया खस भासं जिज्ञासा तयाच्वंगु ताःगु खः ।
ख नं खः, उमित थथे जुइगु स्वाभाविक हे जुल–ज्याथजिथिपिं नाप ब्वलनाम्ह जिं तकं गबलें हे मन्यनागु मखनागु लु जिं उगु संकिपाय् स्वये खन ।
गथेकि, याग्ला प्याग्ला वंक म्हं मफुम्ह, थीमत्यः जुयाच्वंम्ह ल्वगियात गुरुजुं वासः यायेमाल धाःसा ल्वगिया ल्हाःया नारीइ कचिकां छच्वः चिनाः कचिकाग्वाराया मेगु च्वः गुरुजुयाथाय् यंकाः वासः याःगु झीगु पौराणिक प्रविधि प्रत्यक्ष झीसं खंकेफु ।अथेहे मेमेगु खँत– गथेकि, प्वक त्यनातःथाय् त्यपय् कः संकेबलय् वसतय् लाइ धकाः छपा ल्हाः पूवंक हे लंच्व त्वयाः कः संकेगु झीगु नेवाः पह क्यनातःगु लु स्वयेदु ।
बजां त्वनेत फू फू यानाः मि ख्वाइगु पहः, क्वाराक्वारा सःवयेक त्वनीगु पहः (थौंकन्हय्या ल्याय्म्ह पुस्तां त्वनीगु शीशाथें) नं न्ह्यइपुक स्वयेदु ।अय्लाः कायेत थःगु तुति दुयाः क्यनेफुम्ह जामनः गुभाजुया जहानया पुरुषार्थ अले अय्लाः कायेत माःगु हलंज्वलंया कथहंया ब्वज्या– गथेकि हासि, पोतासि, गुलु, जँहिँसा,लः तय् बाता, तःप्वाःगु भुतू आदि नं झीसं लुदंक स्वयेदु ।
थौंकन्हय्या करोडौं करोडया गाडी गये माःपिं, जनताया
हिचःतिं हःगु लोकतन्त्र, गणतन्त्रया नेता नेतृतय्त थुगु संकिपाया प्रजावत्सल जुजु प्रतापमल्लया देन क्यने फुसा छुं भति देय् व
जनता प्रति उत्तरदायी जुइ ला ?
तःमागु सिमाया कचा थःगु तुतिं क्वस्वकाः च्वलय् दुगुचातय्त नकाच्वंगु अले चटकें सिमा कचा ज्वनीबलय् वयात नापं ब्वयेका यंकीगु नापं मरुसतःयात २०७२ सालया भुखाचं पाःताः यानाबिउसां भिएफएक्स प्रविधिं पुलां बाखंया लुनापं मरुसतः प्रत्यक्ष स्वये खंकाबिउगु दु।
चटकेयागु सातु कायेत इमा जुयाः मचाया नुगःचु क्वानाः यंकूगु नं भिएफएक्स प्रबिधि छ्यलाः क्यनातःगु झीसं लुइके फइ।
अथेहे चटकें ग्यानापुक्क चटक यानाः मस्त, मनूतय्त ख्यानाच्वंम्ह चटकेया स्वकुमिपिनि ध्यान मेथाय् सालेत दोकय् लः जायेकाः क्यनेत नं थ्व हे भिएफएक्स प्रविधिं ज्या कयातःगु दु । चटक आदिया खं मस्तय्त गाक्कं मनोरञ्जन बी धयागु जिं तायेका ।जामनः गुभाजुया जप तपया बलं जपतुंया लः तप्यंक त्वने जिउगु विशेषता कथं प्वाः स्याःम्ह मचायात त्वंकाः क्वलाःगु खँ क्यनातःगु दु ।
अथेहे काय्या इहिपाया भ्वय् मनकू धकाः तंम्वयाः स्वमफाःम्ह जःलाखःला भौमचायाके दुबिउ वयाः दुःख बिउगु लु अले गुरुजुया
तन्त्र शक्तिं दुःख बिउम्ह मनू सिद्ध यानाः क्यनाबिउगु लुं तन्त्र शक्तिया बल क्यना तःगु तसकं न्ह्यइपुसे च्वं ।
ध्वंप्वालय् च्वंम्ह नागं पुनाहःगु, पुँइ हायाबिइगु प्रबिधि, जातः क्यंवःम्हेसित दशा मभिंगुलिं थाय्थासय् द्यःपिंत पुज्याना बिइगु गुरुजुया उजं, झारय् यायेगु, अले थः लिलाःबलय् मस्तय्त आखः ब्वंकाबिइगु गुरुजुया परोपकारी गुण आदि खनीबलय् जिमि मां, अजिपिं गुरुजुपिंथाय् जातः क्यंजुइगु लु मिखाय् झलझल लुमना वः ।
नापं छेँछेँय् गुरुपिंसं मस्तय्त आखः स्यनीगु (जिमि बाज्यांनं पसलय् च्वनाः जिपिं मस्तय्त आखः स्यना बियाच्वनीगु लु, अले हनेबहःम्ह जिमि गुरुबाः मरु ख्यःक्यबया रामलाल मानन्धर उपासक) नं छसीकथं लुमंकाबिल ।
देशय् लः मदयाः हाहाकार जुयाच्वंबलय् जामनः गुभाजुं प्रजाया दुःख तंकेत,भूत प्रेत पिशाचत दुगु स्वयम्भूया शान्तिपुर दुने वनाः नवनागया हिं च्वयातःगु शास्त्र पिने हयेफत धाःसा वा वइ धइगु विश्वासं, तान्त्रिक गुरुजुया दीक्षाकथं जुजु प्रताप मल्ल थः स्वयंहे वनाः उगु शास्त्र कयाहइ ।
संकिपा ज्यानामि रवि साय्मिया न्हापांगु पलाः खयां नं मेमेगु ऐतिहासिक, पौराणिक संकिपाय् नं पलाः न्ह्याकादिल धाःसा वय्कःया पलाः धिसिलाइगु सम्भावना खनेदु ।
थौंकन्हय्या करोडौं करोडया गाडी गये माःपिं, जनताया हिचःतिं हःगु लोकतन्त्र, गणतन्त्रया नेता नेतृतय्त थुगु संकिपाया प्रजावत्सल जुजु प्रतापमल्लया देन क्यने फुसा छुं भति देय् व जनता प्रति उत्तरदायी जुइ ला ? जनतां पूगु करंलज्या मचासें श्री ६, श्री ७ जुइगु पंचायतकालीन ईया पुनर्जागरण रुप क्यनेगु पाखें तापाके फइ ला ?
गबलें थः लिलाःबलय् भौमस्तय्त हायेकेथें यानाः ख्याः यानाः तुंथिइ लः तुयाः तःकः घः जायेके धुंसां हाकनं हाकनं लः मदया वंकाबिइफुगु तन्त्र शक्तिया बल प्रदर्शन आदिं गुरुजु, रत्नमाया व गुरुमांया अभिनय कला अति हे ल्वःवनापुसे च्वं । 4K format UHD प्रबिधि छ्यलाः color grading यानाः छायाँकन यानातःगुलिं नेपाःया पुलांगु सहर चित्लांग व थीथी थाय्या लु तसकं यइपुक क्यनेज्या जूगु तायेका ।
ध्यान समाधिइ मगन जुयाच्वंम्ह जामनः गुभाजुं जिं खापा मचायेकूतक चायेके मते खंला धाःसां, स्वन्हु दयाः नं पिहां मवःगुलिं जहानम्हेसिया नुगलं फये मफयाः खापा चायेकः वनीगु लुं मिस्तय् नुगः क्यातु अले धैर्य म्हो जूगु खँ उलाः क्यं ।
ख्वपया बिस्काः जात्राया बाखनय्, किपूया बाघ भैरवया बाखनय्, सँदेशय् वनीगु ‘जि वया ला लछि मदुनि’ आदि बाखनय् थें धाःथें मयाइगु, बांलाक न्यनेकने मयासें न्यनाखँय् बिश्वास यानाः मनू मंत धकाः जातः नापं उना छ्वयेगु झीगु चलनकथं थःगु छेँय् दुहां वयेमजियाः वनवास वनेमाःगु खँ थुगु संकिपाय् नं झीसं खंकेफु ।
जामनः गुभाजु (सुशील राजोपाध्याय), जहान मय्जु (सरस्वती मानन्धर), जुजु प्रताप मल्ल (पुष्कर भक्त माथेमा), भक्त (उदेन न्हूसाय्मि), न्हूम्ह भौमचा (अमिता जोशी), माजुम्ह रत्न माया(अन्नपूर्णेश्वरी श्रेष्ठ) चटके (साकार पन्त) नापं सकलें कलाकारतय्गु अभिनय च्वछायेबहः जू । थाय्थासय् हास्यरसया खँल्हाबल्हां संकिपा स्वयाच्वनाबलय् भचा हे म्हाइपु मजू ।
गुरुजुया भक्त जुयाः म्हितूम्ह उदेन न्हूसायमिं गुरुजु मदयाः नुगःमछिंकाः निर्दोष पहलं ख्वःगु लुं जिगु मिखाया निगुलिं कुं प्याका बिउगु खः । छम्ह धिसिलाःम्ह सिनेमाटोग्राफर जुयाः नं निर्देशनय् ल्हाः तयादीम्ह भाजु रवि साय्मिया कुतः तसकं धिसिलाः ।भाजु सुशील राजोपाध्यायया धकिंबाखं, खँल्हाबल्हा(सम्बाद), शीर्ष म्ये सकतां माःकथं थासय् लाः ।
म्येहालामि भाजु मय्जुपिनिगु सः नं गनं ध्वयेथाय् मदु, अथे हे बालकृष्ण वंशीजुया संगीत नं उलि हे च्वछायेबह जू ।परम्परागत बाजंत गथे किनाय्खिं, धिमय्, भुस्याः, खिं, पंय्ताः आदिया छ्यला नं संकिपाया सशक्त पक्ष खः ।१७ औं शताब्दीया मल्ल जुजु प्रताप मल्लया ईया तिसा, वसः, समाः, मस्तय्सं च्वइगु नेवाः लिपि आखः आदि सकतां पाय्छि जुइक हनेबहपिं गुरुजुपिं लिसें च्वनाः बांलाक बिचाः विमर्श याःगु खनेदु । अथे खःसां इतिहास खः, खँ मल्वाइ धकाः धाये थाकु ।
जुजु प्रताप मल्लया लाय्कूया विश्वासपात्र, सिद्धहस्त तान्त्रिक जामनः गुरुजु सर्वसाधारण मनूत लिसें लाय्कू तकं सकलसितं माःगु लँपु क्यनाः सर्वप्रिय जुइफुम्ह महापुरुष कथं क्यनातःगु व उगु शीर्ष भूमिकाय् वरिष्ठ कलाकार सुशील राजोपाध्यायजुं पाय्छि कथं न्याय यानादीगु दु ।
गुरुमांजुया भूमिकाय् सरस्वती मानन्धरया सहज अभिनय, हास्य रसयात नं अःपुक ब्यक्त यानादीगु पह तसकं हे नासलं लिउ । सकलें कलाकारतय्सं थःथःगु भूमिकाय् न्याय यानादीगु दु ।संकिपा ज्यानामि रवि साय्मिया न्हापांगु पलाः खयां नं मेमेगु ऐतिहासिक, पौराणिक संकिपाय् नं पलाः न्ह्याकादिल धाःसा वय्कःया पलाः धिसिलाइगु सम्भावना खनेदु ।
थुगु संकिपा मस्त, ल्याय्म्ह, ल्यासे, बाझःवंपिं, ज्याथ जिथि सकसिनं ययेकी कथं निर्माण जूगु स्वकुमिपिनिगु हूलं धयाच्वंगु दु । निर्मातात जेस्सी पेन्नी इन्टरटेन्मेन्टया राजेन्द्र भक्त श्रेष्ठ व वाइल्ड बुल्स प्रोडक्सनया मन्दिरा मानन्धरपिंत भिंतुसें संकिपाया सफलताया कामना याना ।
LEAVE YOUR COMMENTS