आः नेवाः भासं नं सफू पिकायेगु तयारी

तःदँ तक नेपालय् च्वनाः भाजु फेडरिक मोनोंभल तयार यानादीगु शोधग्रन्ध फ्रेञ्च भासं च्वयाः बुझे नं यानादीधुंकल । लिपा अंग्रेजी भासं उकिया उल्था यायेगु ज्या जुल । अंग्रेजी भासं थ्व सफू ‘भाइटालिटी अफ ल्यांग्वेज एण्ड रिलिजन एमोङ द बुद्धिष्ट नेवार्स इन द काठमाडौं भ्याली’ धइगु नां तयाः पिहां वःगु खः ।

आः लसताया खँ छु धायेबलय् थ्वहे सफू नेपालभाषां नं पिहां वइगु जूगु दु । अंग्रेजी सफूयात चीधं यासें उकी तुं नेपालभाषा नं तयाः सफू पिकायेत्यंगु खः । आः छखे अंग्रेजी व मेखे नेपालभाषा तयाः थ्व सफू पिहां वइ । थुकिया अनुवाद नेपालभाषाया च्वमि लिसें व्याकरणविद् बिष्णु चित्रकारं यानादीगु खः ।

नेवाः भासं थ्व सफूया नां ‘द मिसन अफ द नेवार्स ः अपहोल्डिङ नेपालभाषा एण्ड बुद्ध धर्म’ धकाः तःगु दु । थ्व सफूया प्रकाशक धाःसा वय्कः थः हे जुयादी । अध्ययन अध्यापनपाखें थःत प्राप्त जूगु छुं भचा ध्यबा वय्कलं थ्व सफू प्रकाशनय् खर्च यानादीत्यंगु खः । थम्हं अध्ययन यानागु भाय्या च्वन्ह्याकेगु लागिं थम्हं फुगु याये धइगु मती तयाः वय्कलं सफू प्रकाशन यायेगु मती तयादीगु खः ।

अंग्रेजी सफूयात चीधं यासें उकी तुं नेपालभाषा नं तयाः सफू पिकायेत्यंगु खः

थ्व सफुली उकियात हे कयाः जनकवि दुर्गालाल श्रेष्ठं च्वयादीगु छपु कविता नं दुथ्याइ । भाजु फेडरिकया मेहनत व नेवाः भाय् प्रति वय्कःया मतिनायात च्वछायाः दुर्गालाल श्रेष्ठं उगु कविता च्वयादीगु खः । थ्व सफू सुरुइ फ्रेञ्च भासं पिहां वःगु खः । ला हर्माट्टन पब्लिकेशन पेरिसपाखें “Langue et religion au Népal. Les Néwar bouddhistes de la vallée de Kathmandu” धइगु नां तयाः पिहां वःगु खः ।

वयां लिपा वहे सफू अंग्रेजी भासं पिहां वल । आः नेवाः भासं पिकायेगु तयारी जुयाच्वंगु दु । फ्रान्सया मेपिं विद्वानतय्सं वय्कःया थ्व सफू व उकिया विषयवस्तुयात न्हूगु विषय धकाः ययेकादीगु खँ नं वय्कलं कनादीगु दु । आः नेवाः भासं पिहां वइगु सफूयात नं नेवाः ब्वँमितय्सं ययेकीगु वय्कःयात आशा दु ।

नेपालभाषा टाइम्स

च्वमिया मेमेगु

• आः गुकथं गठन जुइ न्हूगु सरकार ?
• प्रधानमन्त्रीयात अविश्वास – सुनां छु धाल
• ओलीया पक्षय् ९३ विपक्षय् १२४ मत
• दोल्खा भिंद्यःयात चःति वयेवं सीडीओ चिन्तित
• कोरोना पनेत जुवा तास प्रतिबन्ध !