बाहिरी चक्रपथ दयेकेगु अझं अनिश्चित तर जग्गाया भाः थहां वनाच्वन

येँ – स्वनिगलय् दयेकेत्यंगु बाहिरी चक्रपथया जःखः लाःगु जग्गाया भाः थौंकन्हय् धमाधम थहां वनाच्वंगु दु । बाहिरी चक्रपथ दयेकेगु जूगुलिं जग्गाया भाः थहां वनाच्वंगु खँ स्थानीय वासिन्दां धाःगु दु । बाहिरी चक्रपथया ५०० मिटर जःखः च्वंगु जग्गा न्याइपिं अप्वया वयेवं जग्गाया भाः नं थहां वनाच्वंगु खः ।

आयोजनां विकास याइगु जग्गाय् थीथी कथंया सुविधा दइगु जूगुलिं जग्गाया भाः थहां वनाच्वंगु खँ धाःगु दु । तर स्थानीय वासिन्दां तत्काल जग्गा मीगु स्वयां आयोजना दयेकेधुंकाः जक जग्गा मीगु मनस्थिति दयेकाच्वंगु दु । आः प्रति आना जग्गाया भाः १० लाख तका वंसां नं आयोजना क्वचाइगु इलय् झिदुगं अप्वः भाः वइगु सम्भावना दुगुलिं स्थानीय जनता जग्गा मीत लिचिलाच्वंगु खँ धाःगु दु ।

बाहिरी चक्रपथ दयेकेगु निंतिं न्हापांगु खण्ड चोभार–सतुंगः ६.६ किलो मिटर क्षेत्रय् कित्ताकाट यायेगु व न्याये–मीगु ज्या बन्द यायेगु प्रस्ताव उपत्यका विकास प्राधिकरणं मन्त्रिपरिषदय् छ्वयेगु तयारी यानाच्वंगु खँ धाःगु दु । तर आयोजना दयेकेगु तयारी जुयाच्वंगु इलय् अनया ३ हजार स्वयां अप्वः जग्गा कित्ताकाट जूगुलिं आयोजनाया अलाइन्टमेन्ट तकं हीकेमाःगु अवस्था वयाच्वंगु दु । थुकिं रिंगरोड चीहाकः जुइगु जूगु दु ।