ने. सं. ११४४ कौलाथ्व पारू - नःलास्वनेगु

राजधानीया निर्णय मतदानं,प्रदेशया आः वइगु बैठकय् मतदान जुइगु निर्णय

येँ – प्रदेश सभाया आः च्वनीगु बैठकं प्रदेश नम्बर ३ या स्थायी राजधानी बारे निर्णय याइगु खँ सीदुगु दु । सभामुख सानुकुमार श्रेष्ठया आह्वानय् म्हिगः च्वंगु सर्वदलीय बैठकं संसदीय प्रक्रियां हे स्थायी राजधानी निर्धारण यायेगु धकाः निर्णय याःगु खः ।

सहमतिं हे राजधानी बारे निर्णय यायेगु धकाः मुख्यमन्त्री डोरमणि पौडेलं धयादीगु खःसां दुई तिहार बहुमतं जक राजधानी क्वःछीमाःगु संवैधानिक व्यवस्था दुगुलिं मतदान धाःसा याये हे माःगु खँ धाःगु दु । संविधानया धारा ८ या उपधारा २८८ स प्रदेशया राजधानी बारे निर्णय यायेबलय् मत विभाजन जुइगु प्रक्रियाय् वनेमाःगु व्यवस्था यानातःगु दु ।

तर सर्वसम्मतिं प्रदेशया राजधानी क्वःछीगु धाःसां नं थ्व ज्या उलि अःप धाःसा मजूगु खँ सीदुगु दु । विशेषतः पार्टी अध्यक्ष लिसें प्रधानमन्त्री केपी ओली काभ्रेय् ३ नम्बर प्रदेशया राजधानी दयेकेगु पक्षय् दुसा मेम्ह अध्यक्ष प्रचण्ड धाःसा हेटौंडायात हे राजधानी दयेकेगु पक्षय् दुगुलिं प्रदेशया राजधानी क्वःछीगु ज्या उलि अःपू मजुइगु खँ एमाले सूत्रं धाःगु दु ।

सूत्रया कथं प्रदेशया राजधानी काभ्रेय् तयेगु पक्षय् दुई तिहाइ सांसद दु । तर प्रदेशया कारणं पार्टी दुने समस्या वये फइगु अवस्था दुगुलिं राजधानी क्वःछीगु निर्णय तत्काल मजुइफुगु खँ नं सूत्रं धाःगु दु । अथे हे निम्ह अध्यक्षपिनिगु हे स्वार्थं यानाः प्रदेशया नां क्वःछीत नं थाकुयाच्वंगु खँ सूत्रं धाःगु दु ।

थ्व विवादं यानाः आः मेगु छुं ई तक ३ नम्बर प्रदेशया अस्थायी राजधानी हेटौंडाय् हे कायम यायेगु मानसिकताय् नेतात दुगु खँ नं उगु सूत्रं धाःगु दु ।आपालं सांसदपिं काभ्रेय् राजधानी तयेगु पक्षय् दुसां मुख्यमन्त्री डोरमणि पौडेल धाःसा हेटौंडायात हे राजधानी दयेकेमाःगु पक्षय् दी ।
सर्वसम्मत रुपं प्रदेशया राजधानी क्वःछीगु धाःसां नं संसदया बैठक गबले च्वनीगु धइगु तकं निश्चित मजूनि ।

सूत्रया कथं यःमरी पुन्हि न्ह्यः प्रदेशसभा संसदया बैठक तकं च्वनीगु अवस्था मदुनि । थौंकन्हय् कांग्रेस महासमितिया बैठकया तयारी जुयाच्वंगु व न्ह्यःने वःगु यःमरि पुन्हिया कारणं पुस ७ गते न्ह्यःने बैठक च्वनीगु सम्भावना मदु ।

प्रदेश राजधानी सम्भाव्यता अध्ययन समितिं हेटौंडा, काभ्रे, ख्वप, नुवाकोट व चितवनयात राजधानीया रुपय् छनोट याःगु खः ।मुख्यमन्त्री पौडेलयात नेपाली कांग्रेस लगायत मकवानपुर, चितवन व धादिङया सांसदतय्सं साथ बियाच्वंगु खँ धाःगु दु ।