ने. सं. ११४४ कौलाथ्व पारू - नःलास्वनेगु

मानन्धर संघया सभापतिया बिचाः मुँज्या

येँ(नेपालभाषा टाइम्स)- केन्द्रीय मानन्धर संघया मदुम्ह सभापति सुवर्णमान मानन्धरया लुमन्तिइ विचाः मुँज्या जुल । संघया ग्वसालय् मंगलवाः बिज्यासःस्थित ससुख्वातय् च्वंगु नेपालभाषा मंकाः खलःया दबू छेँय् उगु विचाः मुँज्या जूगु खः ।

संघया कार्यवाहक सभापति बद्रनारायण मानन्धरया सभापतित्वय् जूगु ज्याझ्वलय् उपस्थित सकसिनं मदुम्ह सुवर्णमानया किपाय् स्वां देछानाः वय्कःया लुमन्तिइ छगू मिनेट मौन धारण यःगु खः ।

ज्याझ्वलय् थँहिति मानन्धर गुथिया न्वकुलिसें प्रबुद्ध व्यक्ति प्रा. डा. त्रिरत्न मानन्धरं गुथि जक मखु मानन्धर समुदायया निंतिं छुं यायेमाः धइगु सोच दुम्ह व्यक्तित्व जूगु विचाः तयादिल । मानन्धर संघया सभापतिइ निर्वाचित जुयादीगु दिं कुन्हु बहनि मानन्धरं थः संघया सभापतिइ निर्वाचित जूगु व आः संघयात न्ह्याकेत थःत सुझाव व योजना बीत धयादीगु खँ लुमंकादिल ।

अथे हे मेम्ह प्रबुद्ध व्यक्तिलिसें संघया पुलांम्ह उपसभापति पंच –कुमारी मानन्धरं मदुम्ह सुवर्णमानं उम्मेदवारी दर्ता यायेत वःगु इलय् वय्कःया उमेर व संघया निंतिं ज्या यायेगु योजनाया बारे न्यनाबलय् थः अजू चाःगु खँ कनादिल । वय्कलं धयादिल, ‘सुवर्णमानजुं अबलय् थः ८८ दँ दुगु व संघया निंतिं छुं याये धकाः वयागु खः, थ्व उमेरय् नं वय्कःया जोश, जाँगर व इच्छा न्यनाः जि थः तसकं अजूचाल ।’

थँहिति मानन्धर गुथिया छ्याञ्जे गौतम साय्मिं छुं नं ज्या वा योजना शुरु यात धाःसा उकियात पूवंके हे माः धइगु धारणा सुवर्णमान मानन्धरयाके दु धयादिल । ज्याझ्वलय् मदुम्ह सुवर्णमानया तःधिकःम्ह काय रमेश मानन्धर, नेपाल खुद्रा व्यापार संघया नायः पवित्र वज्राचार्य, श्रीपंचमि मानन्धर गुथिया नायः सिद्धिकुमार मानन्धर, शिवरात्री गुथि ख्वपया विष्णुबहादुर मानन्धरं मदुम्ह सुवर्णमानया थीथी पक्ष व वय्कःया व्यक्तित्वयात कयाः चर्चा यानादीगु खः ।