निगूगु चरणया खोप बीगु सुरु

येँ – कोभिड १९ विरुद्धया खोपया निगूगु चरण नेपालय् म्हिगः निसें सुरु जूगु दु । भारतं ग्वाहालि कथं बिउगु झिगू लाख मात्राया कोभिशिल्ड खोप वयेवं सुरु जूगु न्हापांगु चरणया खोप अभियान माघ २४ य् क्वचायेवं म्हिगः निसें निगूगु चरणया खोप अभियान सुरु जूगु खः ।
निगूगु चरणय् यक्व मनूतय् लिसे स्वापू तयाच्वनेमाःपिं सरकारी कर्मचारी, सञ्चारकर्मी, कुटनीतिक नियोगया पदाधिकारीपिंत बीगु खँ कोभिड १९ खोप सल्लाहकार समितिया संयोजक डा. श्यामराज उप्रेतीं धयादीगु दु ।

न्हापांगु चरण अभियानय् लक्ष्य तयातःगु स्वयां म्हो जक खोप बीफुगुलिं ल्यंदुगु खोप बीगु सुरु याःगु खः । न्हापांगु चरणय् ४ लाख ३० हजारम्हेसित खोप बीगु लक्ष्य तयातःगु खःसां मुक्कं १ लाख ८४ हजार ८५७ म्हेसिनं जक खोप काःगु खः । संयोजक उप्रेतीया कथं पत्रकार व कुटनीतिक नियोगया कर्मचारीतय्त म्हिगः निसें हे खोप बीगु सुरु याःगु खःसा सरकारी कर्मचारीतय्त छन्हुनिन्हुं खोप बीगु सुरु याइ । अग्रपंक्तिइ च्वनाः ज्या यायेमाःपिं सरकारी कर्मचारीतय् विवरण संकलन जुयाच्वंगुलिं उमित छन्हु निन्हुं लिपा जक खोप बीगु खँ संयोजक उप्रेतीं धयादीगु दु ।

पत्रकारतय्त निजामित कर्मचारी अस्पताल न्हू वानेश्वरय् व कुटनीतिक नियोगयापिंत पाटन स्वास्थ्य विज्ञान प्रतिष्ठान, त्रिभुवन विश्वविद्यालय शिक्षण अस्पतालय् खोप बीगु सुरु याःगु खः । निगूगु चरणया खोप बीगु ज्या झिन्हु दुने क्वचायेकेगु खँ धाःगु दु । पत्रकारतय्सं खोप कायेगु निंतिं परिचयपत्र व सुचना विभागया पौ ज्वना वनेमाःगु खँ धाःगु दु ।

सम्बन्धित बुखँ

LEAVE YOUR COMMENTS