सुष्मा स्वराजयात सुनां सःतूगु ? एमालें सःतूगु खःसा छाय् सःतल धइगु न्ह्यसः

येँ – नकतिनि नेपाः भ्रमण यानाः स्वदेश लिहां वंम्ह भारतीय विदेशमन्त्री सुष्मा स्वराजयात नेपाः भ्रमणया ब्वनापौ सुनां बिउगु ? स्वराज स्वदेश लिहां वनेधुंकाः नेपाःया राजनीतिक वृत्तय् थ्व न्ह्यसः पिहां वःगु दु । निःसन्देश स्वराजयात नेपाः सरकारं ब्वनापौ बियाः सःतूगु मखु । सरकारं ब्वनापौ हे मबीकं मेगु देशया विदेशमन्त्री थः यत्थे नेपाः वल धकाः स्वयम् सरकारय् हे दुथ्याःम्ह उपप्रधानमन्त्री कमल थापां वय्कःयात नापलायेत अस्वीकार यानादिल ।

न्ह्यागु देशया नं विदेशमन्त्री मेगु देशय् वनेबलय् प्रोटोकल मिले यानाः जक वनेमाः, अथे थः यत्थे यानाः वयेगु धइगु उगु देशया सार्वभौमिकतायात हे अस्वीकार यायेगु खः धकाः थापां थः सतीपिं मनूतय्त कनेगु यानाच्वंगु दु । माओवादी नेतातय्सं स्वराज सुयागु ब्वनाय् नेपाः वःगु धकाः कुत्तुकुलेवं तिनि एमाले अध्यक्ष केपी ओलीं वय्कः एमालेया हे ब्वनाय् नेपाः वःगु धकाः न्ववानादीगु खँ चर्चाय् वःगु दु । तर एमालें स्वराजयात निमन्त्रणा छ्वयेगु धकाः गबलें गनं हे निर्णय मजूगु दावी एमालेया मेपिं नेतातय्सं धयाच्वंगु दु ।

स्वराज नेपाः वलं नं थज्याःगु इलय् वल कि एमालेया वरिष्ठ नेता लिसें पुलांपिं प्रधानमन्त्रीद्वय माधव नेपाल व झलनाथ खनाल निम्हं हे नेपालय् मदी । वय्कःपिं निम्हं इरानया राजधानी तेहरानय् वनाच्वंगु इलय् स्वराज नेपाः थ्यंकः वःगु खः । एमालें स्वराजयात सःतूगु हे खःसां छाय् सःतल ले धइगु न्ह्यसः नं पिहां वःगु दु । कांग्रेसया गुलिं नेतातय्सं चुनावया इलय् जिमिसं भारतयात नं धायेजिक्व ब्वः बिया, आः चुनाव सिधल, सम्बन्ध बांलाकाः वने नु धायेगु लागिं सःतूगु खः धकाः नं धयाहःगु दु ।

ओली भारत वनी कि मवनी ?

भारतीय विदेशमन्त्री सुष्मा स्वराजया नेपाः वःगु इलय् छता खँया यक्व चर्चा जुल – न्हापा न्हापा नेपाःया नेतात जक भारतय् ब्वाँय् वनीगु खः, आः भारतया नेतात नं नेपालय् ब्वाँय् वयेगु शुरु जुल । तर परराष्ट्रविद्तय्सं धाःसा थ्व खँ अबले जक पूवंक धाये फइ गबले केपी ओली नेपाःया प्रधानमन्त्री नियुक्त जुयादी । ओली प्रधानमन्त्री जुइवं वय्कलं न्हापांगु भ्रमण भारतय् यानादी लाकि यानादी मखु । यदि ओली प्रम जुइवं दकले न्हापां हे भारतया भ्रमण यानादिल धाःसा आखिर वय्कः नं नेपाःया मेपिं प्रधानमन्त्रीत स्वयां छुं फरक मदु धइगु पुष्टि जुइ ।

छाय्धाःसां नेपालय् न्ह्याम्ह हे प्रधानमन्त्री जूसां दकलय् न्हापां भारतया भ्रमण यानाः अन थःगु हाजिरी निं जने याः वनी धइगु आम चलन जुइधुंकूगु दु । ओलीं थ्व चलनयात त्वाःथःसा जक वय्कः धाथेंयाम्ह राष्ट्रवादी जुइ धइगु विश्लेषण थन याना हःगु दु । ओलीयात न्ह्याथे यानाः नं प्रधानमन्त्री जुइवं हे भारतय् निं सःतेगु लागिं हे स्वराजया थ्व भ्रमण जूगु अनुमान नं याना हःगु दु ।

सम्बन्धित बुखँ

LEAVE YOUR COMMENTS