रञ्जना लिपि स्यनेज्याया दसिपौ लःल्हात

येँ – इतुंबहाः सुधार समिति व येँ मनपा २४ वडाया मंकाः ग्वसालय् जूगु रञ्जना लिपि स्यनेज्याय् सहभागि जुयादीपिंत दसिपौ लःल्हाःगु दु । थनया त्रिभुवन पार्कय् छगू गुँभ्वय् यासें लिपि सयेकादीपिंत दसिपौ लःल्हाःगु खः । समितिया नायः मनोज शाक्यया सभापतित्वय् जूगु ज्याझ्वलय् येँ मनपा २४ वडाअध्यक्ष बालकृष्ण श्रेष्ठं दसिपौ नापं उत्कृष्ट जुयादीपिंत सिरपाः लःल्हानादीगु खः ।

ज्याझ्वलय् नेपाल लिपि गुथिया नायः निरञ्जन ताम्राकारं ताःलाःपिं सकसितं लिच्वः पौ लःल्हानादीगु ज्याझ्वलय् नेपाल बालमन्दिर येँ जिल्लाया नायः भगवान शाक्य व समितिया दांभरि हितेश शाक्यं ताःलाःपिं प्रशिक्षार्थीतय्त उपहार लःल्हानादीगु खः ।

नेपाल लिपि गुथिपाखें जूगु लिपि कक्षाय् गुथिया स्यनामि शरद कसाःयात गुरुपुन्हिया लसताय् सकल विद्यार्थी व समितिपाखें उपहार देछाःगु खः । लिपि स्यनेज्याय् प्रशिल शाक्य, तिसा शाक्य व निलिमा महर्जन छसिकथं न्हाप, लिउ व लियांलिउ जुयादीगु खः ।