ने. सं. ११४४ ञलागा पारू -

राजधानी माग यासें वीरगञ्ज बन्द, मर्यादापालकयात दौरासुरुवा: निषेध

थौं २,५, ६ व ७य् प्रदेशसभा बैठक

प्रदेश २ या न्हापांगु प्रदेश सभा बैठक जुइत्यंगु इलय् वीरगञ्जय् राजधानी दयेकेमाः धकाः थौं वीरगञ्ज बन्द याःगु दु । प्रदेश नं. २ या राजधानी जनकपुरय् थौं प्रदेश सभाया न्हापांगु बैठक जुइत्यंगु दु ।

मेखे वीरगञ्ज बन्द यानाच्वंपिं सुथय् दुने स्वंगः गाडी तोडफोड यायेधुंकूगु दुसा बन्दं यानाः थनया जनजीवन प्रभावित जुयाच्वंगु दु ।
वीरगञ्जयात राजधानी दयेकेमाः धकाः आन्दोलन यानाच्वंपिं बन्दकर्तातय्सं थनया घण्टाघर, आदर्शनगर क्षेत्रय् छगः भारतीय गाडी व छगः निजी गाडी तोडफोड याःगु खः । थन बन्दकर्तातय्सं सुथंनिसें हे सतक पनाच्वंगु खः ।
प्रदेश राजधानी वीरगञ्ज दयेकेमाः धकाः गठन यानातःगु संघर्ष समितिं थौं हे बैठक च्वनाः मेगु ज्याझ्वः बीगु खँ धाःगु दु ।

थौं प्रदेश नं. २ या लिसें ५, ६ व ७ या नं न्हापांगु प्रदेशसभा बैठक च्वनेत्यंगु दु । प्रदेश ५ या बैठक बुटवलय् जुइसा, ६ या सुर्खेत व ७ या धनगढीइ जुइ ।

मर्यादापालकयात दौरा सुरुवाल निषेध !
प्रदेश सभा २ लय् बैठकस्थलय् च्वनीपिं मर्यादापालकयात दौरा सुरुवाल न्ह्याकेमबीगु खँ धाःगु दु । अप्वः धयाथें मधेश केन्द्रीत दल त्यानावःगु थ्व प्रदेशय् सांसदतय्सं धाःसा थः यःकथं वसः पुनेदइ, तर मर्यादापालकयात दौरासुरुवात मपुनेत धाःगु दु ।
थनया सांसदतय्सं शपथ ग्रहण याःबलय् नं थःथःगु मांभासं शपथग्रहण याःगु खः । थन ४७ म्हेसिनं मैथिली, २५ म्हेसिनं भोजपुरी, २४ म्हेसिनं नेपाली व ११ म्हेसिनं हिन्दीभासं सपथ नःगु खः ।