ने. सं. ११४४ कछलागा सप्तमी -

चाबही गणेद्यःया जात्रा क्वचाल

येँ – चाबहीया चन्द्रविनायक व भैरवनाथ जात्रा क्वचाःगु दु । वंगु कछलाथ्व सकिमिलापुन्हिकुन्हुनिसें न्ह्याःगु जात्रा कछलागा तृतियाकुन्हु क्वचाःगु खः । तृतियाकुन्हु अमालकोट कचहरीया द्वारें सिन्दुर छायेवं जात्रा विधिपूर्वक क्वचाःगु खः । लिपांगु दिंकुन्हु चन्द्रविनायक व भैरवयात अबिर छायेवं जात्रा क्वचाःगु माने याइगु खः ।

करिब स्वसःत्या दँ न्ह्यः ने.सं. ८०१ य् जुजु भूपालेन्द्र मल्लं थ्व जात्रा संचालनय् हःगु धइगु विश्वास यानातःगु दु । सकिमिलापुन्हिकुन्हु चाबहिलिं शुरु जूगु थ्व जात्रा कछलागा तृतिया प्यन्हुतक पशुपति, मित्रपार्क, जयबागेश्वरी, बौद्ध चुच्चेपाटी लगायत थीथी थासय् नं जात्रा यायेगु याइ ।

स्वनिगःया प्यम्ह विनायक मध्ये छम्ह चन्द्रविनायकया जात्राया न्हापांगु दिं नच्चापिं मस्तय्त चन्द्रविनायकया प्रसादया रुपय् म¥हःजा नकेगु ज्या जूगु खः । निन्हुया दिंकुन्हु गणद्यःयात हलिमलिलिसें मरिचरि छानाः प्रसादया रुपय् जात्राय् वःपिंत इना बिउगु खः । वयां लिपा कचहरीया द्वारे पूर्ण डंगोलं चन्द्रविनायक देगलय् विशेष पुजालिपा जात्रा शुरु जूगु खः ।

जात्राया लिपांगु दिं जात्रा सफलतापूर्वक क्वचाःगु लसताय् स्थानीयतय्सं न्हिछियंकं चाबहिलिइ सिन्हः जात्रा याःगु खः ।जात्राया झ्वलय् चन्द्रविनायक व भैरवया द्यःखः देगः जःखः चाःहिकेधुंकाः गंगाहितिइ यंकाः स्नान याकेगु व वयां लिपा निगुलिं द्यःखःयात चारुमति विहारय् यंकेगु चलन दु ।