नरःया सांस्कृतिक जीवन्तता ल्यंकेत थौं ‘वर्ल्ड कार फ्री डे’
येँ(नेपालभाषा टाइम्स)÷येँ महानगरपालिका वडा नं. ५ या धार्मिक व ऐतिहासिक लागा नरलय् ‘वर्ल्ड कार फ्री डे–२०२३’ ज्याझ्वः जू वनाच्वंगु दु । थ्व झ्वलय् थौं नरः लागाय् सवारी साधनयात पूर्ण रुपं निषेध यानातःगु दु ।
हाँडीगाउँ गुरुयोजना अन्तर्गत स्मारक क्षेत्रया वातावरणीय सुधार यायेगु लक्ष्य ज्वनाः ग्वसाः ग्वःगु ज्याझ्वःया निंतिं येँ महानगरपालिकां नरः लागाय् थौं सुथसिया ८ ताः इलंनिसें सनिलया ८ ताःईतक सवारी साधन निषेध यानातःगु दु । महानगरं थौंया ज्याझ्वःयात लक्षित यासें नरःया दथु त्वाः, कृष्णद्यःया देगः नरः दबू, क्वताल त्वाः तकया सतकखण्डय् सवारी निषेध यानातःगु दु ।
सवारी निषेध यानातःगु थुपिं लागाय् सुथंनिसें नरःया मौलिक जीवन पद्दतिलिसे सम्बन्धित सुकू थायेगु, सिँज्या, चाया थलबल दयेकेगु थेंज्याःगु कला व सीप, मौलिक नसा ज्वलं, परम्परागत वाद्यवादन, गायन, हुलाप्याखं, रञ्जना लिपिं नां च्वयेगु, थीथी मनोरञ्जनात्मक कासालिसे सतक महोत्सव जुइगु महानगरं जानकारी बिउगु दु ।
वडाअध्यक्ष वीरेन्द्र प्रजापतिं उगु लागा जुयाः थःगु गन्तव्यय् वनेमाःपिं सवारी चालकं हिजाखुसीया कोरिडोरलिसें वैकल्पिक मार्ग प्रयोग यायेफइगु जानकारी बियादीगु दु । ऐतिहासिक महत्वया नरःयात लिच्छवीकालीन वस्तीकथं कायेगु यानातःगु दुसा संस्कृति, सम्पदाया प्राचीन थाय्कथं नं कायेगु यानातःगु दु ।
लुमंकेबहजू छुं दिं न्ह्यः जक नरःया सांस्कृतिक जीवन्तता ल्यंकेत धासें तयार याःगु गुरुयोजनायात कयाः सरोकारवालातय् दथुइ सहलह जूगु खः । नरःया सांस्कृतिक जीवन्तता ल्यंकेत तयार याःगु गुरुयोजनायात कयाः सांस्कृतिक, सामाजिक, वातावरणीय व पूर्वाधार लगायतया कोणं सहलह ब्याकूगु खः ।
LEAVE YOUR COMMENTS