उत्कृष्ट पुननिर्माण–मरुसतः

मेमेगु सम्पदा नं मरुसतःया मोडेलं हे दयेका यंकेमाःगु सुझाव।

येँ – थौंकन्हय् पुनर्निर्माण जुयाच्वंगु थीथी सम्पदात मध्ये मरुसतःया पुनर्निर्माण दकलय् बांलाक व दकलय् मौलिक शैलीं जुयाच्वंगु खँ विज्ञतय्सं धाःगु दु ।काष्ठमण्डप पुनर्निर्माण समितिपाखें म्हिगः याःगु पत्रकार सम्मेलनय् न्ववासें पुरातत्वविद् इन्जिनीयर डा. सुदर्शनराज तिवारीं भुखाय् लिपा थीथी सम्पदाय् जुयाच्वंगु पुनर्निर्माण मध्ये मरुसतःया पुनर्निर्माण पुरातत्वया फुक्क हे मूल्य व मान्यतायात अंगीकार यानाः न्ह्यानाच्वंगु खँ कनादीगु खः ।

उगु पत्रकार सम्मेलनय् न्ववासें पुरातत्व विभागया हनुमानध्वाखा दरवार लागा प्रमुख अरुणा नकर्मीं थ्व भुखाय् लिपा मरुसतःया जग म्हुयाः स्वयाबलय् थुकिया निर्माण ७ औं शताब्दीइ जूगु धइगु प्रमाणित हे जुइगु दसु लूगु खँ कनादिल । वय्कलं मरुसतःया ज्या बांलाक जुयाच्वंगु जुयाः आः मेमेगु सम्पदाया निर्माण नं थ्वहे मोडेलय् (जनस्तरपाखें समिति दयेकाः) निर्माण याना वनेमाःगु बिचाः नं तयादिल ।

मेम्ह पुरातत्वविद् भाजु काइ वाइजें मरुसतः वास्तवय् भुखाय् ब्वयाः जक क्वःदःगु मखु धयादिल । इलय् ब्यलय् थुकिया मर्मत सम्भार मयाःगु कारणं थ्व क्वःदःगु खँ अध्ययनपाखें सीदुगु जानकारी बिसें वय्कलं आः मरुसतः पुनर्निर्माणया झ्वलय् जुयाच्वंगु सम्पूर्ण ज्याया अभिलेख तयेगु यानाच्वनागु व मरुसतः निर्माण सम्पन्न जुल कि थुकियात स्वंगू भासं सफू हे दयेकाः प्रकाशन यायेगु खँ कनादिल ।

पत्रकारतय्सं न्यंगु न्ह्यसःया लिसः बिसें डा. तिवारीं सामान्यतया सिँयागु आयु द्वःछिदँ तक जक दइ धाइ तर मरु सतलय् झिन्यासःदँ पुलांगु व आः तक नं बल्लाःनिगु सिँ लुया वःगु खँ कँसें थ्व वास्तवय् छु जातयागु सिँ खः धइगु खँ आः तक पत्ता लगे मजूनिगु खँ नं कनादिल ।

काष्ठमण्डप पुननिर्माण समितिया नायः लिसें प्रदेश ३ या सांसद राजेश शाक्यं मरुसतः दयेकेत येँ महानगरपालिकापाखें प्राप्त जूगु ५ करोड ५० लाख तका दां मध्ये ४ करोड २८ लाख दां ल्यः दनिगु व बाँकी ध्यबा जक खर्च जूगु जानकारी बियादिल । प्यदँया दुने सम्पन्न यायेगु ताः दुगु मरुसतः आः वइगु असारं छतँ दयेके सिधयकेगु लक्ष्य तयातःगु दु ।