ख्वपया सिद्धिलक्ष्मी देगःया ताःचाः लःल्हात

ख्वप – संस्कृति, पर्यटन व नागरिक उड्डयन मन्त्री रवीन्द्रप्रसाद अधिकारीं थनया लायकू लागाय् च्वंगु सिद्धिलक्ष्मी देगःया ताःचा ख्वप नगरपालिकाया प्रमुख सुनिल प्रजापतियात लःल्हानादिल । २०७२ साल बैशाख १२ गतेया तःभुखाचं क्षतिग्रस्त जूगु देगः पुनःनिर्माण लिपा देगःया ताःचा लःल्हाःगु खः ।

उगु देगः नेपाल सरकार, पुरातत्व विभाग व ख्वप नगरपालिकाया मंकाः सहकार्यय् पुनःनिर्माण याःगु खः । पुनःनिर्माण क्वचाःगु देगःया उलेज्या यानादिसें मन्त्री अधिकारीं सम्पदाया पुनःनिर्माणलिसें संरक्षण, संवद्र्धनया ज्याय् नगरपालिकां म्हितूगु भूमिका च्वछायेबह जूगु धासें भुखाचं क्षतिग्रस्त मेमेगु सम्पदाया पुनःनिर्माणय् माःगु ग्वाहालिया निंतिं नेपाल सरकार तयार दुगु धयादिल ।

ख्वप नपाया प्रमुख सुनील प्रजापतिं सांस्कृतिक नगरी ख्वप देशय् च्वंगु सम्पदा ख्वपया जक मखसे झी सकसिगुं मंकाः सम्पत्ति जूगु खँ न्ह्यथँसें ख्वप नगरपालिकां सम्पदा लगायत मेमेगु ऐतिहासिक, सांस्कृतिक, पुरातात्विक ल्याखं महत्वपूर्ण सम्पदा व स्मारक पुनःनिर्माण ठेक्कापट्टाय् स्वयां नं अमानतय् उपभोक्ता समितिपाखें याकेगु खँय् बः बिया वयाच्वनागु जानकारी बियादिल ।

पुरातत्व विभागया महानिर्देशक भेषनारायण दाहालं ख्वपया सम्पदा पुनःनिर्माणय् नगरपालिका नाप सहकार्य यानागु खँ कनादिल । इन्जिनियर मोहनकृष्ण श्रेष्ठं सम्पदा संरक्षणया निंतिं म्हितेमाःगु थीथी पक्षयात खँयात कयाः थःगु नुगःखँ तयादीगु खः । ज्याझ्वः लिपा मन्त्री अधिकारीं स्थलगत अवलोकन नं यानादीगु खः ।

सम्बन्धित बुखँ

LEAVE YOUR COMMENTS