नमूना तयार मजुयाः ज्या न्ह्याके मफयाच्वन
येँ – चालु आर्थिक दँय् आकाशे ताँ दयेकेत नमूना तयार याःगु येँ महानगरपालिकां सार्वजनिक चःबिया नमूना धाःसा तयार याये फयाच्वंगु मदु । येँ मनपां सार्वजनिक चःबि निर्माणया निंतिं नमूना तयार यायेगु धाःसां थ्व सम्बन्धी ज्या न्ह्याके फयाच्वंगु धाःसा मदु । येँ मनपां वंगु आर्थिक दँय् हे सार्वजनिक चःबि निर्माण यायेगु ज्या अन्तिम चरणय् थ्यंगु धाःसां लिपांगु इलय् वंगु साउन १ गतेनिसें ज्या शुरु यायेगु धया वयाच्वंगु खः ।
येँ मनपां दयेकेगु धयाच्वंगु सार्वजनिक चःबिया निर्माण यायेत जक म्होतिं नं प्यलाया ई काइगु अनुमान दु । येँ मनपां न्हापांगु चरणय् निर्माण यायेत्यंगु सार्वजनिक चःबिया प्रभावकारिता व मेमेगु थासय् नं उकिया आवश्यकता स्वयाः थप थासय् आवश्यककथं चःबि निर्माण यायेगु योजना दयेकूगु खः ।
येँ मनपा निजी–साझेदारी इकाइ प्रमुख महेश काफ्लेया कथं चालु आर्थिक दँया न्हापांगु महिनाय् हे झिगू थासय् सार्वजनिक चःबि दयेकेगु योजना दुगु खःसां नमूना तयार मजूगुलिं ज्या न्ह्याके मफयाच्वंगु खः । ‘छगू सार्वजनिक चःबि दयेकेत म्होतिं नं १० लाख निर्माण लागत तुइगु अनुमान दु ।
तर गुलि नं चःबि दयेके धकाः वइपिं निर्माण कम्पनी दु, इमिसं म्होतिं नं छगू चःबिया निंतिं १५ गू लाख लागत तुइगुकथंया इष्टिमेट यायेगु यानाच्वंगु दु । उकिसनं थःपिंसं धयाच्वनागुकथंया नमूना नं वयाच्वंगु मदु, उकिं चःबि निर्माण यायेगु योजना न्ह्याके मफयाच्वंगु खः’, वय्कलं धयादिल ।
येँ महानगरपालिकाया प्रमुख विद्यासुन्दर शाक्यं थःगु चुनावी घोषणा पत्रय् तकं येँ महानगरयात ‘क्लिन द सिटी’ दयेकेगु व थ्व योजना कथं सार्वजनिक चःबि निर्माण यायेगु योजनायात प्राथमिकता बियादीगु खः । तर चःबिया नमूना तयार याये मफुगुलिं आतक ज्या न्ह्याके फयाच्वंगु मदु । सार्वजनिक चःबि दयेकेत धकाः सडक विभागं येँ महानगरपालिकायात येँ महानगर लागा दुनेया थीथी पीनिगू थासय् अनुमति तकं बीधुंकूगु दु ।
LEAVE YOUR COMMENTS