पद्मदाइ मदयाःलि ….

आइतवाः ११३८ कौलागा १२ कुन्हु न्हिनय् नेपालभाषा टाइम्सया रमेशदाइ, तेज महर्जनपिं नाप १ ताः इलय् आशा सफूकुथिइ नापलायेगु ज्या । खास यानाः थ्व नापलायेगु ज्या धइगु नेपालभाषा टाइम्सपाखें निक्वःगु नेपालभाषा साहित्य नखः हनेगु झ्वलय् पद्मदाइया ख्यालः नं क्यनेमाःगु जुयाः उकिया बारे सहलह यायेगु व कलाकारत मुनेत खः ।

थ्व ज्याझ्वःया निंतिं पद्मदाइनं निपु ख्यालः च्वयाच्वनादीगु खः । छपु पूवन । छपु मवंनि । रमेशदाइ, तेजपिं इलय् थ्यंकः वल, नापं अस्मीत व नीरा नं दु । पलखं हे कलाकार मय्जु छम्ह नं थ्यन, तर छम्ह कलाकार भाजु मथ्यंनि । अथेहे १.३० बजेति जुल, उकिं थःपिंसां छुं छुं खँल्हाना च्वने धइगु सहलह ब्यात ।

आकाझाकां अस्मीतया मोबाइल न्यात । खँ न्यनेवं झस्के जुल । उखें मल्लदाइनं फोन यानाहःगु जुयाच्वन । ख्वाः गर्खेसे तयाः अस्मीतं धाल, ‘पद्मबा मन्त हँ !’ जिपिं सकलें छझाः स्तब्ध जुल । सुयागु नं म्हुतु चायेके मजीक तालं ग्वयातःथें । संयोग गुम्हेसिगु बारे खँ ल्हायेत्यना व हे आकाझाकां मंत धाःबलय् नुगः छथुं काइँया मिनावल ।

अथेसां खँ ल्हायेगु कुतः यानाच्वना । तर सुयागुं हे बोलि स्पष्ट मजूथें तायाच्वन । सकसिगुं ख्वखना सः । मथ्यंनिम्ह पासा नं थ्याक्क थ्यंकः वल । अप्वः खँ मजू । पद्मदाइयात श्रद्धाञ्जली देछायेकथं सम्भवतः वय्कलं च्वयादीगु अन्तिम ख्यालः न्ह्यब्वयेगु क्वःजित । स्वम्ह जक कलाकार दुगु थ्व ख्यालकय् सलोना वज्राचार्य, कर्ण वज्राचार्य व शरद कसाःपिंत रमेशदाइनं निर्देशन यानादीगु जुल ।

हानं मल्लदाइनं जितः फोन यानादिल, ‘पद्मदाइ मदुगु सिल हे जुइ, भूषणदाइयात कन्टाय्क्ट यानाच्वनागु कन्टाय्क्ट हे मजू, पद्मदाइ च्वसापासाया नं नायः जूगुलिं गथे यायेमाली सल्हा यायेमाःगु, आः छेँय् निं यंकेत्यंगु दु, थन छक्वः निं मुनेमाली’ धयादिल । जिं तुरुन्त भूषणदाइयात खबर याना । बांमलाःगु खबर, पत्याः याये थाकुगु खँ ।

न्यनेवं भूषणदाइनं ‘का आम्कन हे वये’ धकाः सर्गः पाःताः छस्वा याये थें तुरुन्त थ्यंकः झाल । काचाकाचा च्वसापासाया दुजःपिंत फोनं जानकारी बियादिल । थ्वयां लिपा जिं नं आशा सफूकुथि गुथिया दुजःपिंत खबर याना ।उकुन्हु तिनि सोमबाः बहनी अन्नपूर्ण न्यूरो हस्पिटलय् पद्मदाइयात स्वःवनागु । उबलय् मल्लदाइ, भरतदाइलिसें आपालं पासापिं मुनाच्वंगु ।

जिपिं सकलें आइसीयुया लुखां पिने हे च्वनाः स्वयावयागु । व ख्वाः झलझल मिखाय् लुया वयाच्वन । लछि लत्याति न्ह्यः जक यंलाथ्व ७ शनिबाःकुन्हु पद्मदाइया जंक्वया लसताय् नागरिक अभिनन्दन यासें हनागु । उगु ज्याझ्वलय् वय्कलं न्ववानादीगु नं लुमना वयाच्वन, ‘जिगु तन जक बुरा जूगु खः, मन बुरा जूगु मखु, शरीर कमजोर जूसां जिगु बिचार कमजोर मजू, सत्यमोहनदाइ सछिदँय् थ्यनाच्वंगु दु, जि नं सछिदँ म्वाइ … ’ पद्मदाइ नं न्ह्याबलें न्ह्यागु विषयया खँ न्ववानादीसां निराश खँ गुबलें न्ववानादीमखु । न्ह्याबलें आशावादी खँ न्ववानादी ।

वय्कःया न्ह्यागुं साहित्यिक लेखन निबन्ध, ख्यालः, प्याखं, बाखं आदि फुक्कलिसं सकारात्मक पक्ष व संघर्षशीलताया खँ दयाच्वनी । थ्व हे पद्मदाइया विशेषता खः ।मनू जन्म जुइवं छन्हु सी नं माः । थ्व साश्वत सत्य खः । थ्व फुक्कस्यां सिउगु खँ नं खः । तर प्रत्येक जातिया दुने थःथःगु हे धापू, जनविश्वास दयाच्वनी ।

नेवाःतय् दुने नं छगू अजूचायापुगु धापू दु — च्याय्हाःगु दशा मभिं । आस्तिक नास्तिकया खँ, पत्याः यायेगु मयायेगु खँ छखे हे । अय्नं थ्व धापू पद्मदाइयात मिले जूवःला धइथें च्वनावल । खःला मखुला ? वय्कःया जंक्व क्वचायाः ७८ दँ क्यनाच्वंगु ई । नेपाल संवत् ८८८ धुंकाः थ्व संवतयात थौंतकया उचाईलय् थ्यंकूम्ह व्यक्ति पद्मरत्न ।

थौं नेपाल संवत् ११३८ या अन्तपाखे वय्कः मंत । सन् २०१८ व विक्रम संवत्य् कात्र्तिक १८ गते दु । थुलिमछि ८ ल्याःया संयोग खनेदुगु नं बिचाः यायेमाःथें च्वनावल । आपाःसिनं थथे नं धाः — मनूतय् जंक्व छगू सिधलकि तसकं म्हं मफये यः । यदि थ्व मफुगु छगू लायेके फःसा ताःईतक जिन्दगी हने खनी । मसिउ थजाःगु हे खँत नुगलय् दासि वयाच्वन ।

मन मच्वं । छथासं च्वंच्वंथे च्वने मछूथें जुयाच्वन । छेँय् थ्यंला मथ्यंला अस्पतालय् दुपिं छम्ह निम्ह पासापिंके न्यनेकने याना । छेँय् यंकेगु ला राष्ट्रिय सभागृह यंकेगु ला धइगु खँ नं जुयाच्वन थें । लिपा छेँय् हे यंकीगु धायेवं थन मुनाच्वनापिं भरतदाइ, भूषणदाइ, गणेशदाइ, नारद वज्राचार्य, किरण साय्मि सकलें छेँय् वना ।

पद्मदाइयात मातनय् तयातल । दुर्गालाल मार्साब, मल्लदाइपिं सकलें दु । मनूत म्वःम्वः वयाच्वपिं दु । जिपिं नं मातनय् स्वःवना । पद्मदाइ छुं हे मजूम्हथें याउँक, शान्तं ग्वारातुलाच्वंगु दु । तर म्हुतुं धाःसा छुं धायेत्यंम्ह थें च्वं । छुुं धाये मानिम्ह थें च्वं । ल्हाः निपां ज्वजलापिसे ‘सुखावति भूवनय् बास लायेमा’ धकाः प्रार्थना यानाः छचाः चाःहिलाः श्रद्धाञ्जली देछाया । ताउतक च्वनेगु आँट हे मंत ।

तुरुन्त हे पिहां वया ।तलय् दुर्गालाल मार्साब, मल्लदाइपिं छेँजःपिंलिसे च्वनाः कन्हय् पद्मदाइया महायात्राया लँपु, ई आदिबारे सहलह ब्याकेज्या जुल । सकलें पीतया क्वथाय् वनाः सान्त्वना बीत भुंवन । अन नं पलख च्वनाः पिने हे वया । मनूत वयांच्वंपिं दु, वनांच्वंपिं दु । थीथी पार्टीया नेतात नं आपालं दु । तर थःत धाःसा विराट शून्यताया अनुभूति जुयाच्वन ।

मनय् दुने गनं गनं ग्याःचिकुं हय्काःवःथें जुयाच्वन । मतिइ हे मदुकथं गुगु दुर्घटना जुल उकिया दूरगामी लिच्वःया कल्पना तकं याये मफयाच्वन । ने.सं. ११३५÷वि.सं. २०७२ या तःभुखाचं आपालं देय्यागु सांस्कृतिक सम्पदा ध्वस्त जुल । थ्व ध्वस्त जूगुली छथ्वः लय्ताःपिं नं दु धइगु न्यना ।

थथे लय्ताःपिनिगु बिचारय् थ्व फुक्क नेवाःतय्गु सम्पदा खः, आः नेवाःतय्सं छु फुइँ याइ धकाः खः । थजाःगु देशय् च्वंच्वनाम्ह जि । आः नेवाःलिसें उत्पीडित मनूतय्त जुयाच्वंगु अन्यायया विरोधय् ख्वयाः सः तइम्ह मदये धुंकल, आः छिमिसं छु फुइँ याइ धाइपिनिगु बोलबाला नं न्यने दइतिनि ।

पद्मरत्नं थ्व मयाः, व मयाः धाइपिं वास्तवय् उपिं नं झन् छुं मयाइपिं खः । आः उमिगु व अजाःगु हे प्रवृत्तियापिनिगु अराजक ज्याखँ नं स्वये मालीतिनि । ओहो ! थजाःगु हे कल्पना यायां नुगः हे झ्यात्तुसे च्वनावल । थ्व हे झ्यात्तुगु नुगः व पद्मदाइनं छु धायेत्यंगु जुइ धइगु न्ह्यसः घानाः लुरुलुरु लिहां वया ।

सम्बन्धित बुखँ

LEAVE YOUR COMMENTS