येँ महानगरपालिकां छुट व सहुलियत बीगु

येँ – येँ महानगरपालिकां थःगु नगरपालिकाय् बसोबास यानाच्वंपि व व्यवसाय यानाच्वंपिंत थीथी कथंया सुविधा बीगु घोषणा याःगु दु। म्हिगः येँया राष्ट्रिय सभागृहलय् जूगु महानगरपालिकाया वइगु आर्थिक दँ २०७७-७८ नीति तथा कार्यक्रम न्ह्यब्वसें मेयर विद्यासुन्दर शाक्य उगु घोषणा यानादीगु खः ।

मेयर शाक्यं कोरोना भाइरस नियन्त्रण व आर्थिक पुनरुत्थान केन्द्रीत जुयाः न्ह्यब्वःगु नीति तथा कार्यक्रम न्ह्यब्वःगु खः । थुकी थीथी व्यवसाय यानाच्वंपिंत कर छुटया लिसें सहुलियत त्यासाया ज्याझ्वः तकं दुथ्याकातःगु दु। मेयर शाक्यं व्यापार व्यवसायलय् वःगु अप्रत्यासित मन्दीयात केन्द्रीत यानाः महानगर दुने सञ्चालन जुयाच्वंगु सपिब मल, होटल, रेष्टुरेन्टयात विशेष सहुलियत बीगु व्यवस्था यानागु खँ धयादीगु दु ।

उकथं हे वय्कलं करदातायात छुटया व्यवस्था यानागु व प्रशासनयात करदातामैत्री दयेकाः व्यवसाययात करय् छुट बीगु नीति नालागु जानकारीनं बियादिल ।

मेयर शाक्यं कोरानाया कारणं आपालं बेरोजगार जुइमाःगुलिं उमित कृषिइ आकर्षित यायेगु आज्जु कथं कृषकया निंतिं लाय् तयेगु कथं ऋणया व्यवस्था यायेगु खँ नं धयादीगु दु। आपालं युवात विदेशं लिहां वःगुलिं उमित आधुनिक कृषि प्रणाली तिबः बीकथं सहुलियत त्यासा बीगु खँ धयादीगु दु। लिसें स्थानीय सीप व उद्यमय् लगानी याकेगु वातावरण दयेकेगु खँ नं वय्कलं धयादीगु दु ।