रोशनीया हिलावं च्वंगु बयानं घटना शंकास्पद

येँ – महरा प्रकरणया मूख्य पात्र जुयादीम्ह मय्जु रोशनी शाहीया हिलाः हिलाः पिहां वयाच्वंगु धापुतिं थ्व घटनायात झन् झन् रहस्यमय दयेका बिउगु दु । वय्कलं म्हिगः हे ‘नागरिक खबर’ नांगु छगू अनलाइनयात अन्तर्वार्ता बिसें महरां थःत छुं नं कथंया दुव्र्यवहार मयाःगु खँ स्पष्ट रुपं धयादीगु दु ।

अथे खःसा वय्कलं महरायात छाय् अज्याःगु द्वपं बियागु ले धइगु न्ह्यसःया लिसलय् वय्कलं थः डिप्रेसनया शिकार जुयाः वासः नयाच्वनाम्ह जूगुलिं उकिया हे लिच्वः कथं अथे न्ववाये लाःगु खः धयादीगु दु । थ्व स्वयां न्ह्यः वय्कलं महरां अय्लाः त्वना वयाः थःत जबर्जस्ती याःगु द्वपं बिसें सञ्चार माध्यमतय्त थःगु छेँय् हे सःताः फुक्कं क्वथा व अनया अवस्था निरीक्षण समेत याकादीगु खः ।

आः वयाः हानं महरां थःत छुं दुव्र्यवहार याःगु मदु धकाः वय्कलं बियादीगु अन्तर्वार्तां थुकी मेगु अनेक न्ह्यसः थना बिउगु दु । विपक्षीतय्सं आः महरा बचे यायेगु लागिं वय्कलं थःगु बयान हिउगु धकाः द्वपं बिया हःगु दुसा सरकारं थःगु शक्ति प्रयोग यानाः वय्कःयात न्याना काःगु धकाः नं धयाहःगु दु ।

वय्कलं आः तक थ्व प्रकरणयात कयाः महरा विरुद्ध प्रहरीइ जाहेरी नं बिउगु मदुनि । मिडियाय् थुभनं खँ वयेधुंकाः आः प्रहरीइ जाहेरी बिउसां जिउ धकाः यक्वस्यां धालं नं वय्कलं श्रीमानयाके न्यनाः जक पलाः न्ह्याके धकाः पन्छे जुयादीगु खः । लिसें प्रहरीं वय्कःयात जबर्जस्ती पुष्टी यायेगु लागिं आः हे मेडिकल टेस्ट यायेगु लागिं याःगु इनापयात नं वय्कलं अस्वीकार यानादीगु खँ सीदुगु दु ।

बलात्कार थेंज्याःगु केशय् फयांफछि याकनं मिसाया मेडिकल टेष्ट यायेमाःगु प्रावधान दु । तर वय्कलं आः तक टेष्ट यायेत नं आनाकानी यानाच्वंगु खँ सूत्रं धाःगु दु । थ्व घटना खः वा मखु धकाः पुष्टि यायेगु मेमेगु नं यक्व आधारत दुगु व उकिया समेत अनुसन्धान यायेगुपाखे प्रहरी लगे जुइधुंकूगु खँ सीदुगु दु ।