यलया तग्वःगं धेचुया वन

यल – मल्लकालीन इलय् स्वनिगःया स्वंगुलिं सहरया नगरवासीयात छुं नं सुचं बीमाल धाःसा गं थानाः सुचित याइगु खः । उकिं स्वनिगःया स्वंगुलिं सहरय् ततग्वःगु गं तयातःगु दु । तर अज्याःगु गं थौंकन्हय् संकटय् लाइगु अवस्थाय् थ्यंगु दु । विशेष यानाः २०७२ सालया तःभुखाचं अज्याःगु तग्वः गं संकटय् लाइगु अवस्थाय् थ्यंगु खः ।

भुखाचं हे क्षतिग्रस्त तग्वःगंमध्ये यलया गं पुनःनिर्माण याये फयाच्वंगु मदु । तःभुखाचं क्षति याःगु यल लाय्कू लागाय् च्वंगु आपालं देगः, दरवार लगायत सम्पदा व स्मारकया पुनःनिर्माण जुयाच्वंसां तग्वःगं धाःसा पुनःनिर्माण याये फयाच्वंगु मदु । भुखाय् ब्वंगु स्वदँ दतं नं गं सुरक्षाया निंतिं सामान्य मर्मत यायेगु ज्या तकं मजुइवं गं हे बेक्वया वनाच्वंगु दु ।

पाटन दरवार संरक्षण तथा हेरचाह ज्याकूया कथं तग्वःगंया क्वसं च्वंगु पसः मचिइकूतले पुनःनिर्माणया ज्या न्ह्याके फइगु सम्भावना मदु । ज्याकूया प्रमुख काजीमान प्याकुरेलं कनादीकथं तग्वःगंया क्वय् तयातःगु पसः चिइके फत धाःसा पुनःनिर्माणया ज्या नं याकनं शुरु जुइ ।
‘तग्वःगंया क्वय् च्वंगु पसः चिइकाः पुनःनिर्माण शुरु याये हथाय् जुइधुंकूगु दु ।’

, वय्कलं धयादी, ‘दकलय् अप्वः क्षति जूगु स्मारकया पुनःनिर्माणया ज्या न्ह्यायेधुंकूगु अवस्थाय् आः तग्वःगं नं पुनःनिर्माणया निंतिं प्राथमिकता बी हथाय् जुइधुंकूगु दु । यल लाय्कू लागाया मेमेगु स्मारक व सम्पदास्थल तग्वःगं नं पर्यतकीय आकर्षणया ल्याखं म्हो मजूगु वय्कलं धयादी ।

न्हापा न्हापा सुचं बीगु निंतिं छुं नं माध्यमया विकास मजूगु इलय् छुं नं सार्वजनिक सुचं बीगु निंतिं उपयुक्त माध्यम जुयाच्वंगु तग्वःगं आः वयाः पर्यटकतय् निंतिं आकर्षणया केन्द्र जुयाच्वंगु ज्याकुथिं न्ह्यथंगु दु ।

विश्व सम्पदाया धलखय् लानाच्वंगु यल लाय्कू दुनेया आपालं सम्पदा व स्मारक तःभुखाचं क्षतिग्रस्त याःगु खःसा उकीमध्ये छुं छुं महत्वपूर्ण स्मारक काठमाडौं उपत्यका संरक्षण कोषं पुनःनिर्माण यायेधुंकूगु दुसा छुं छुं सम्पदा व स्मारक नेपाल सरकारं याना वयाच्वंगु दु ।