फास्ट ट्राय्कय् संसदया ध्यान

राज्य व्यवस्था समितियाःपाखें स्थानीय जनतालिसे अन्तक्र्रिया

येँ – नेपाली सेनां दयेकाच्वंगु फास्ट ट्राय्कं स्वनिगःया स्थानीय जनताया वस्ती प्रभावित यानाच्वंगु खँयात कयाः प्रतिनिधिसभाया राज्य व्यवस्था समितिं चिउताः प्वंकूगु दु । थ्व झ्वलय् म्हिगः राज्य व्यवस्था समितिया छगू पुचः हे बुंगय् वनाः स्थानीय जनता लिसे थुकिया बारे सहलह ब्याकूगु खः ।

समितिया सभापति शशी श्रेष्ठया नेतृत्वय् वंगु सांसदतय् पुचलं स्थानीय जनताया समस्या समाधान यायेगु निंतिं माःगु पलाः ल्ह्वनेगु बचं बिउगु खः । स्थानीय जनतालिसे सहलह यायेगु झ्वलय् समितिं सम्बन्धित मन्त्रालययाके फास्ट ट्राय्क दयेकेगु ज्या जुयाच्वंगु बारे जानकारी कायेगु व वयां लिपा माःगु पलाः ल्ह्वनेगु बचं बिउगु खँ स्थानीय इन्द्रमान तुलाधरं नेपालभाषा टाइम्सयात कनादिल ।

स्थानीय जनतां फास्ट ट्राय्क दयेकेगु झ्वलय् परम्परांनिसें न्ह्याना वयाच्वंगु बुंगद्यः जात्रा, भैरवनाथ जात्रा, मनकामना द्यःया जात्रा, पिगं द्यः, कार्यविनायक, अन दुगु स्कुल आदि समस्याय् लाइगु जानकारी बियादीगु खः । स्थानीय जनतां समिति लिसे खँ ल्हायेगु झ्वलय् न्हापाया प्रतिवेदन कथं फास्ट ट्राय्क बागमति खुसी पारीं यंकेमाःगु माग याःगु खः ।

बागमति खुसि पारीं फास्ट ट्रायक यंकल धाःसा आपालं स्थानीय जनताया बुँ बचे जुइ धासें समितिया ध्यानाकर्षण याःगु खः । स्थानीय जनतायात लिसः बीगु झ्वलय् समितिया पदाधिकारीपिंसं याकनं हे राज्य व्यवस्था समितिया बैठक च्वनाः फास्ट ट्राय्क बारे आवश्यक निर्णय यायेगु आश्वासन बिउगु खः ।

सेनां फास्ट ट्रायक दयेकेगु झ्वलय् डीपीआर तकं तयार मयासें स्थानीय जनताया बुँइ जबर्जस्ती डोजर चले याःगु धासें समिति समक्ष स्थानीय जनतां गुनासो याःगु खः । लिसें समिति समक्ष स्थानीय जनतां मुआब्जा अप्वयेकेमाःगु माग नं याःगु दु । लँ मदुगु जग्गाय् ९ लाख तक न्याये मीगु ज्या जुयाच्वंगु धासें थःपिंत धाःसा सरकारं प्रति आना १ लाख तका बियाः विस्थापित यायेत्यंगु धासें प्रति आना जग्गा २२ लाख तका थ्यंकेमाःगु माग स्थानीय जनतां याःगु दु ।

सेनां फास्ट ट्राय्कया डीपीआर दयेकेगु जिम्मा कोरियाया कम्पनीयात बीधुंकूगु दुसा स्वलाया दुने डीपीआर तयार जुइगु खँ धाःगु दु ।
थ्वहे झ्वलय् फास्ट ट्रायक दयेकेत फास्ट ट्राय्क लाःगु जंगलय् पाःगु सीमा अथें सितिं वनेगु अवस्थाय् थ्यंगु खँ धाःगु दु । फास्ट ट्रायक दयेकेगु धकाः लाखौ सिमा पाःगु खःसां नं उगु सिमाया सही व्यवस्थापन मजुयाः सितिं वनीगु अवस्थाय् थ्यंगु खः ।

फास्ट ट्राय्कपाखें ख्वनाया आपालं बुँज्या याये जिउगु जग्गा कब्जा यायेत्यंगु खँय् नं स्थानीय जनतां विरोध याना वयाच्वंगु दु ।
नेपाली सेनां धाःसा थ्व बारे याकनं निर्णय यानाः थःपिनि ज्या अःपुका बी माल माल धकाः सरकारयात इनाप यानाच्वंगु दु ।