ने. सं. ११४४ कौलाथ्व तृतीया -

बिम्स्टेक सम्मेलन ,पर्वतीय अर्थतन्त्र, पर्यावरण व दिगो विकास प्राथमिकता

येँ – नेपालं बहुक्षेत्रीय प्राविधिक तथा आर्थिक सहयोगया निंतिं बंगलया खाडीया प्रयास (बिम्स्टेक)या प्यक्वःगु शिखर सम्मेलनं पर्वतीय अर्थतन्त्र, पर्यावरण संरक्षण व दिगो विकास मार्फत समृद्धि चूलाकेगु खँय् बः बिउगु दु । जलवायु परिवर्तन व थुकिया असया क्षतिपूर्ति व भूपरिवेस्टित देय्यात केन्द्रय् तयाः विकास व समृद्धिया योजना हयेमाःगु खँय् नेपालं बः बिउगु खः ।

सम्मेलन क्वचायेधुंकाः जूगु पत्रकार सम्मेलनय् न्ववानादिसें परराष्ट्रमन्त्री प्रदीप ज्ञवालीं थ्व क्षेत्रया देय्तय् दथुइ स्वापू तब्याकेगु –कनेक्टिभिटी)या निंतिं दुजः देय्या राष्ट्रिय योजना आगोगपाखें समान प्राथमिकता बियाः एशियाली विकास बैंकया ग्वाहालिं गुरुयोजना तय यायेगु पुचलं ज्या न्ह्याकेगु व थुकिं अन्तिम रुप कायेधुंकाः मंकाः कुतलं स्वापू तब्याकेगु खँ कनादिल ।

वय्कलं धयादिल, ‘स्वापू विस्तार झीगु आधारभूत आधारशिला खः । थुकिया निंतिं कार्यदलं ज्या यानाः थ्व सम्बन्धी परियोजना संचालनय् हयेगु जुइ ।’मन्त्री ज्ञवालीं बिम्स्टेक बडापत्र तयार यायेत नं कार्य समूहं ज्या यानाः वइगु शिखर सम्मेलनय् न्ह्यब्वयेगु क्वःजिउगु खँ कनादिल ।

अथेहे मन्त्री ज्ञवालीं दुजः देय्तय्सं थःगु क्षमता व इच्छा कथं बिम्स्टेक कोषय् ध्यबा तयेगु व थुकिं अनुसन्धानात्मक व नमूना परियोजना संचालन यायेगु खँ नं कनादीगु दु । नेपाल बौद्ध दर्शनया मुहान जूगु व थ्व िवश्वया सम्पदा जुइधुंकाः अवस्थाय् दुजः देय्तय्सं अन्तर्राष्ट्रिय सम्मेलन आयोजनाया घोषणायात सकारात्मक रुपं काःगु धासें वय्कलं बौद्ध परिपथ थःपिनिगु मंकाः चासोया विषय जूगु खँ नं कनादिल ।

सम्मेलनय् बिम्स्टेक स्वतन्त्र व्यापार सम्झौताया निंतिं सन् २००४ य् सैद्धान्तिक सहमति जूगु खःसां थुकिया सम्बन्धिक ढाँचा व सम्झौताया लागि ज्या यायेत लिबाःगु सन्दर्भय् वइगु दिनय् बिम्स्टेकया ज्यायात प्रभावकारी दयेकेत व आवधिक शिखर सम्मेलन हरेक निदँय् तक्वः यायेत नेपालं बः बिइगु खँ नं मन्त्री ज्ञवालीं स्पष्ट यानादिल ।