ने. सं. ११४४ कौलाथ्व तृतीया -

नेपाःमि ज्यामि मलेसिया छ्वयेगु अझं अनिश्चित

येँ – वैदेशिक रोजगारीइ वनीपिं नेपाःमि ज्यामितय् आकर्षक गन्तव्य जुयाच्वंगु मलेसियाय् ज्यामि छ्वयेगु ज्या अझं अनिश्चित हे जूगु दु । नेपाः व मलेसिया दथुइ जुइगु धयातःगु द्विपक्षीय सहलह स्थगित जूगुलिं नेपाःमि ज्यामित मलेसियाय् छ्वयेगु ज्या अझं अनिश्चित जूवंगु खः । थौं बुधवाः जुइ धयातःगु थ्व बैठक वंगु सोमवाः मलेसियां एकपक्षीय रुपं स्थगित यानाबिउगु खः ।

मलेसियां आः मेगु बैठक गुबलय् च्वनेगु नं धाःगु मदुनि । निगू देय् दथुइ शून्य लागतय् ज्यामित यंकेगु बारे सम्झौता जूगु गुला पुले धुंकाः नं आःतकं नेपाःमि ज्यामित मलेसिया वनेफुगु मदुनि । थ्व हे कारणं वैदेशिक रोजगार व्यवसायीतय्सं आन्दोलन तकं न्ह्याकेधुंकूगु दु । वैदेशिक रोजगार व्यवसायीतय्सं मंगलवाःनिसें शान्तिपूर्ण आन्दोलन सुरु याःगु दु ।

नेपाल वैदेशिक रोजगार व्यवसायी संघं सरकारं सिन्डिकेट अन्त्य यायेगु धकाः मलेसियाय् वनीपिं ज्यामितय्त पंगु खःसां आःतकं ज्यामित मछ्वसे बरोजगारतय् हक तकं लाका कयाच्वंगुलिं आन्दोलन घोषणा यायेमाःगु खँ धाःगु दु ।बिचौलियातय्सं थीथी शुल्क धकाः अप्वः ध्यबा कयाच्वंगुलिं सरकारं थगुने जेठ निसें मलेसियाय् वनेगु निंतिं श्रम स्वीकृति बन्द यानाबिउगु खः ।

राष्ट्र बैंकं सेवा शुल्कया रुपय् ०.२५ प्रतिशत जक कायेदइ धयातःगु दु । तर बैंक व वित्तीय संस्थातय्सं धाःसा ग्राहक स्वयां फरक फरक दरय् शुल्क कायेगु यानाच्वंगु दु ।

थ्व धुंकाः वंगु कात्तिकय् मलेसिया व नेपाः दथुइ शून्य लागतय् ज्यामित यंकेगु बारे द्विपक्षीय श्रम सम्झौता जूगु खः । थ्व सम्झौताय् स्वास्थ्य परीक्षणया प्रक्रिया लगायतया विषयय् निगू देय्या दुजः दुथ्याःगु मंकाः कार्यदलया बैठकं क्वःछिउगु खः । थुगु कार्यदलया बैठक थौं च्वनेगु धयातःगु खःसां मलेसियां स्थगित यानाबिउगुलिं मलेसियाय् ज्यामित वनेगु प्रक्रिया हे अन्योलय् लानाच्वंगु दु ।

मलेसियाया निंतिं नेपाली राजदूत उदयराज पाण्डें बैठक स्थगित यायेगु जानकारी बिउसां मलेसियां मेगु बैठकया मिति नं क्वःमछिउनिगु खँ बिबिसीयात धयादीगु दु । वय्कलं मलेसियाया मानव संशाधन मन्त्रालयं बैठकया तिथि पुनरावलोकन यायेगु जानकारी बिउगु, तर आःतक मिति क्वःमछिउनिगु धासें छाय् थथे यात धयागु जानकारी थःके मदुगु खँ धयादीगु दु ।

नेपाःया श्रम मन्त्रालयया अधिकारीतय्सं थ्व कार्यदलया बैठक मच्वंक नेपाःमि ज्यामित मलेसियाय् गुबलय् वनेफइ धयागु खँ धाये फइमखु धाःगु दु ।मेखे वैदेशिक रोजगार व्यवसायीतय्सं धाःसा मलेसियां न्हापाया हे प्रक्रियां ज्यामित यंकेफइगु संकेत बिउगु दु धासें सरकारं सिन्डिकेटया अन्त्य यायेगु पहल याःसां ज्यामित हे छ्वयेगु धाःसा दिकेमजिउगु खँ धाःगु दु । उमिसं आःयात न्हापाया हे प्रक्रियां जूसां ज्यामित छ्वयेमाःगु माग यानाच्वंगु दु ।