‘वुहान भूतया शहर थें च्वना वन’
येँ (नेपालभाषा टाइम्स)÷सदां व्यस्त जुयाच्वनीगु चीनया वुहान शहर कोरोना प्रकोप लिपा सुनसान जुयाः भूत वस्ती थें जू वनेवं अन आखः ब्वनाच्वंपिं नेपाःमि विद्यार्थीत नं तसकं ग्याःगु व उकिं यानाः उपिं स्वदेश लिहां वयेत हथाय्चाःगु खँ अनं लिहां वःपिं नेपाःमितय्सं धाःगु दु ।
थनिं लछि न्ह्यः वुहानय् चिनियाँ न्हूदँ न्यायेकेगु तयारी जुयाच्वंगु इलय् थ्व ल्वय्या महामारी शुरु जूगु खः । ल्वय् न्यना वनेवं स्कूल कलेज बन्द जुल । वयां लिपा पसः बजाः बन्द जुल । अले लँ समेत सुनसान जू वन । नये त्वनेगु सामान न्यायेगु मदया वन । झिन्हुया लागिं न्यानातःगु सामानं लछि गाके माल । वयां लिपा छु यायेगु धइगु समस्या पिदन । लिपा ला त्वनेगु लःया तकं समस्या जुया वल । पिने स्वःसा सुनसान बाहेक छुं मदु । उकिसनं थः नापं च्वनाच्वंपिं मेमेगु देशया विद्यार्थीत नं धमाधम लिहां वनेगु शुरु जुल । न्हिछि न्हिछिं क्वथाय् याकःचा च्वनेमाःबलय् थःपिंत भूतया शहरय् च्वंच्वना थें महसुस जूवंगु खँ नं वय्कःपिंसं कनादीगु दु । छखे थःपिं च्वनाथाय् समस्या जुया वःगु व मेखे ल्वय् धमाधम न्यना वनाच्वन धइगु समाचार नियमति रुपं वयाच्वंगु जुयाः आः थःपिं थःगु हे देशय् लिहां वनेगु बाहेक मेगु विकल्प मंत धकाः सकस्यां निर्णय याःगु खँ नं वय्कःपिंसं कनादीगु दु ।
येँय् वय्कःपिनि नियमित स्वास्थ्य परीक्षणया ज्या जुयाच्वंगु दु ।
चीनया संघर्षय् नेपाःया साथ
जःलाखःला देय् चीनया वुहान लगायतया शहरय् कोरोना भाइरस न्यनाः विश्वया थीथी देशं चीनया नागःतुगः यानाच्वंगु इलय् नेपालय् धाःसा कोरोना भाइरस विरुद्ध चीनं यानाच्वंगु संघर्षप्रति खुल्ला रुपं ऐक्यवद्धता प्वंकेगु ज्या जूगु दु । म्हिगः यलया मंगलय् छगू ज्याझ्वः यासें चीनप्रति सहानुभूति प्वंकुसें कोरोना विरुद्ध ल्वायेत चीनं यानाच्वंगु ज्याखँयात ऐक्यवद्धता व्यक्त यायेगु ज्या जूगु खः ।
ज्याझ्वलय् प्रकोपपाखें पीडित विरामीतय् भिंउसाँय्या कामना यासें थुकिं कयाः मदुपिनि आत्माया चिरशान्तिया कामना याःगु खः । अरनिको सांस्कृतिक एवं ब्यावसायिक प्रवद्र्धन समाजया ग्वसालय् उगु ज्याझ्वः जूगु खँ समाजया नायः अजरमान जोशीं कनादिल ।
थ्व ज्याझ्वः यानाः चीन नेपाःया भिंम्ह पासा जूगु कारणं चीनयात जुयाच्वंगु थ्व विपद्या इलय् नेपाः सदां चीनया साथ दु धइगु सन्देश बीत स्वयागु खँ नं नायः जोशीं कनादिल । ज्याझ्वलय् आपालं विद्यार्थी, व्यवसायी, विदेशी पर्यटक, सांसद लिसें थीथी जनप्रतिनिधिपिनि नं उपस्थिति दुगु खः ।
LEAVE YOUR COMMENTS