वैशाख २० य् स्थानीय चुनाव !

येँ – निर्वाचन आयोगया प्रमुख निर्वाचन आयुक्त दिनेशकुमार थपलियां वर्तमान स्थानीय तहया जनप्रतिनिधिपिनि न्यादँया अवधि पूवनेत्यंगुलिं थ्वहे वइगु २०७९ साल वैशाख २० गते देय्या ७५३ गुलिं स्थानीय तहया निर्वाचन यायेगु तयारी यानाच्वनागु खँ कनादीगु दु ।

स्थानीय सरकार खाली जुइगु विषय कल्पना तकं याये मफइगु व स्थानीय तहया पदाधिकारीपिनिगु ई थप यायेगु व्यवस्था थौंया मिति तकं मजूगुलिं यानाः वैशाख दुने हे निर्वाचन यायेगु खँय् आयोग गम्भीर दुगु खँ नं वय्कलं धयादीगु दु । वय्कःया कथं याकनं हे स्थानीय तहया निर्वाचनया मिति क्वःछीगु निंतिं सरकार समक्ष सिफारिस यायेगु तयारी आयोगं यानाच्वंगु दु ।

वय्कःया कथं वयां लिपा २०७९ फागुन दुने हे प्रदेशया प्रदेशसभा, प्रतिनिधिसभा, राष्ट्रपति व उपराष्ट्रपतिया निर्वाचन क्वचायेकाः न्हूपिं जनप्रतिनिधि ल्ययाः न्हूगु नेतृत्वयात कार्यभार बीगु ज्याय् आयोग न्ह्यायेधुंकूगु धासें उकिया नितिं निर्वाचनयात स्वच्छ, स्वतन्त्र, निष्पक्ष, विश्वसनीय व मितव्ययी रुपय् ज्या यायेगु नितिं आयोगयात ग्वाहालि यायेत नं इनाप यानादीगु दु ।

निर्वाचन आयोगया प्रमुख निर्वाचन आयुक्त थपलियां आः वइगु निर्वाचन लैगिंक लिसे समावेशी दृष्टिकोणं उपयुक्त जुइगु खँ नं धयादीगु दु । निर्वाचन आयोगं म्हिगःनिसें धौख्यलय् न्ह्याकूगु निन्हुयंकंया ‘निर्वाचन सञ्चालन व व्यवस्थापन सम्बन्धी मिसा पत्रकार लिसेया कार्यशाला गोष्ठी’ इ न्ववासें वय्कलं वइगु निर्वाचनया नितिं मिसा पत्रकारपिंत तयाः थीथी विषयसं सहलह यायेत्यनागु जानकारी नं बियादिल ।

स्थानीय तहया निर्वाचन यायेगु ई सतिना वःगुलिं सरकारं स्थानीय तह लिसेलिसें संसदया चुनाव नं नापं याना छ्वयेगु बारे सहलह याःगु खः । तर स्थानीय तहया अवधि लिछ्याये फइगु प्रावधान कानूनय् मदुगु जुयाः स्वंगुलिं तहया चुनाव छक्वलं याये मफइगु सुझाव वःगु खः । उकिं नं अलग अलग हे चुनाव यायेमाःगु खँ धाःगु दु ।

सम्बन्धित बुखँ

LEAVE YOUR COMMENTS